بلوچستان کے ساحلی علاقے حب میں واقع گڈانی جیٹی ان دنوں غیرمعمولی منظر کا باعث بنی ہوئی ہے، جہاں سمندر کا پانی اچانک گلابی رنگ میں تبدیل ہو گیا ہے۔

یہ غیر فطری تبدیلی نہ صرف مقامی افراد اور ماہی گیروں کو حیران کر رہی ہے بلکہ سیاحوں میں بھی تشویش اور بے چینی پیدا ہو گئی ہے۔

واقعے کی اطلاع ملنے پر ماحولیاتی ماہرین نے فوری طور پر علاقے کا معائنہ کیا اور بتایا کہ یہ رنگت پانی میں بڑھتی ہوئی آلودگی اور حیاتیاتی تبدیلیوں کا نتیجہ ہو سکتی ہے۔

 ماہرین کے مطابق پانی میں غیرمعمولی بدبو بھی محسوس کی جارہی ہے، جو اس تبدیلی کو مزید سنجیدہ بنا رہی ہے۔

اس حوالے سے ڈپٹی ڈائریکٹر ماحولیات عمران کاکڑ کا کہنا ہے کہ جیٹی کے بعض حصوں میں پانی طویل عرصے سے رکا ہوا تھا، جس کے باعث قدرتی حیاتیاتی عمل میں بگاڑ پیدا ہوا، اس عمل نے پانی میں موجود خوردبینی جانداروں کو متاثر کیا اور انہی تبدیلیوں کے نتیجے میں پانی کی رنگت گلابی ہوگئی ہے۔

ماہرین نے عوام کو خبردار کیا ہے کہ اس پانی سے دور رہیں کیونکہ یہ ممکنہ طور پر انسانی صحت کے لیے نقصان دہ ہو سکتا ہے۔

شہریوں سے کہا گیا ہے کہ جب تک تحقیق مکمل نہیں ہوتی، گڈانی جیٹی کے پانی میں نہ اتریں اور اس کے قریب جانے سے گریز کریں۔

واضح رہے کہ دنیا بھر میں ایسے واقعات ماضی میں بھی دیکھے گئے ہیں، جن میں سمندری پانی مختلف رنگ اختیار کر لیتا ہے لیکن اکثر یہ مظاہر ماحولیاتی آلودگی اور درجہ حرارت میں تبدیلی کے باعث رونما ہوتے ہیں۔