وزارت خزانہ نے پٹرولیم مصنوعات کی قیمتوں میں ردوبدل کا اعلان کردیا ہے۔

وزارت خزانہ کی جانب سے جاری اعلامیے کے مطابق لائٹ ڈیزل کی قیمت میں 6 روپے 56 پیسےجبکہ مٹی کے تیل کی قیمت میں 2 روپے 39 پیسے کمی کی گئی۔

اعلامیے کے مطابق پیٹرول کی قیمت میں ایک روپے کا اضافہ کیا گیا جبکہ ہائی اسپیڈ ڈیزل کی قیمت 27 پیسے بڑھا دی گئی۔ نئے قیمتوں کا اطلاق یکم نومبر کی رات 12 بجے شروع ہوجائے گا۔

واضح رہے اس سے قبل وزارت خزانہ کی جانب سے پیٹرولیم مصنوعات کی قیمتیں برقرار رکھنے کا فیصلہ کرلیا گیا تھا۔

پیٹرولیم مصنوعات کی قیمتیں ماہ ستمبر کی سطح پر برقرار رہے گی، اس موقع پر وزیر خزانہ کا کہنا تھا کہ عالمی مارکیٹ میں بڑھتی ہوئی پیٹرولیم مصنوعات کی قیمتوں کی وجہ سے ریٹس گزشتہ ماہ کی سطح پر برقرار رہے گی۔

جبکہ آئل اینڈ گیس ریگولیٹری اتھارٹی (اوگرا) نے وزارت خزانہ کو پٹرولیم مصنوعات کی قیمتوں میں کمی کی تجویز دی تھی۔

تجویز میں اکتوبر کیلئے پیٹرول کی قیمت میں 2 روپے 55 پیسے فی لیٹر اور ڈیزل میں 3 روپے 23 پیسے فی لیٹر کمی کی سفارش کی گئی تھی لیکن عالمی منڈی میں پٹرولیم مصنوعات کی قیمتوں میں اضافے کے رجحان کے باعث پٹرولیم مصنوعات کی قیمتیں موجودہ سطح پر برقرار رکھنے کا فیصلہ کیا گیا تھا۔