وفاقی وزیر برائے توانائی عمر ایوب خان نے کہا ہے کہ انڈسٹری کو بھی رعایت دینے کا پروگرام بنایا ہے۔

اسلام آباد میں پریس کانفرنس کرتے ہوئے وفاقی وزیر برائے توانائی کا کہنا تھا کہ حکومت پاور سیکٹر پر 226 ارب روپے سبسڈی دی جارہی ہے جبکہ سبسڈی سے 75فیصد گھریلو صارفین مستفید ہورہے ہیں اور انڈسٹری کو سبسڈی دینے کے حوالے سے کابینہ نے منظوری دیدی ہے۔

انکا کہنا تھا کہ انڈسٹری کو اضافی بجلی استعمال کرنے پر سبسڈی دی جائیگی اور 4 ماہ کیلئے انڈسٹری کو 11 روپے 97 پیسے فی یونٹ بجلی فراہم کی جائیگی اور اس سبسڈی سے انڈسٹری میں 1800 سے 2000 ہزار اضافی بجلی موسم سرما میں استعمال ہوگی۔

وفاقی وزیر کا کہنا تھا کہ گزشتہ روز متبادل توانائی کے 500 میگا واٹ کے منصوبوں کا افتتاح کیا ہے جبکہ 2025 تک 8 ہزار میگا واٹ بجلی متبادل توانائی کے ذرائع سے حاصل کی جائیگی اور اضافی بجلی کی فراہمی سے ملک میں انڈسٹری کا پہیہ مزید چل پڑے گا۔

وفاقی وزیر برائے توانائی عمر ایوب کے ہمراہ پریس کانفرنس کرتے ہوئے سیکرٹری توانائی عرفان علی نے بتایا کہ ماضی میں بجلی کم تھی اور کھپت زیادہ تھی اور چوری بھی بہت زیادہ ہوتی تھی لیکن موسم سرما میں بجلی ڈیمانڈ بڑھ جاتی ہے جس کے لئے انڈسٹریل بزنس اور ڈومیسٹک کیلئے یہ پیکج لایا گیا ہے۔

انہوں نے کہا کہ موسم سرما میں گیس کی کھپت بھی بڑھ جاتی ہے اور موسم سرما میں بجلی کی کھپت صرف 8 ہزار میگا واٹ تک رہ جاتی ہے لیکن نئے پیکج سے انڈسٹری زیادہ دیر چلے گی اور پیداوار بڑھے گی۔