پاکستان کی تاریخ کے سب سے بڑے کنٹینر بردار بحری جہاز کی کراچی آمد نے ملکی جہاز رانی اور بندرگاہوں کے باب میں  ایک نئی  تاریخ رقم کردی۔

تفصیلات  کے مطابق کراچی میں بننے والی گہرے پانی کی بندرگاہ ہیچیسن پورٹ پر 18 دسمبر کی رات 8 بجے لنگر انداز ہونے والا سی وی کوسکو بیلجیئم اب تک پاکستان کی کسی بھی بندرگاہ پر لنگر انداز ہونے والا سب سے بڑا جہاز ہے جس پر 13 ہزار 386 کنٹینرز(ٹی ای یوز) کی گنجائش ہے۔

یہ جہاز 366 میٹر طویل اور 51 میٹر چوڑا ہے جو بندرگاہ پر لنگر انداز رہنے اور 1537 کنٹینرز کی ہینڈلنگ کے بعد 19 دسمبر کو دوپہر اپنی اگلی منزل کی جانب روانہ ہوگیا۔
چیئرمین کے پی ٹی جمیل اختر نے کے پی ٹی کی ٹیم اور آپریشنل عملے کو مبارکباد دیتے ہوئے اسے کراچی پورٹ کے لیے ایک سنگ میل قرار دیا۔

ہیچیسن پورٹس پاکستان کے جنرل منیجر سید راشد جمیل نے کہا کہ سی وی کاسکو بیلجیئم کنٹینر جہاز کی آمد ہمارے لیے باعث فخر ہے کیونکہ ملک میں واحد ہمارا ٹرمینل ہی ایسا ہے جو برتھ کی سہولت کے ساتھ اتنے بڑے جہاز کو ہینڈل کرنے کے لیے جدید ترین ٹیکنالوجی اور صلاحیت سے آراستہ ہے۔

 ان کا  مزید کہنا تھا کہ ہم اپنے پارٹنرز کاسکو کے مشکور ہیں جنہوں نے ہمیں ایک اور تاریخ ساز سنگ میل عبور کرنے میں تعاون فراہم کیا۔ کے پی ٹی نے اس سے قبل 354 میٹر لمبا، 128929 میٹر جسیم اور 45 میٹر بیم والے جہازوں کو ہینڈل کیا تھا۔

 اس اہم سنگ میل پر چیئرمین کے پی ٹی جمیل اختر نے تمام آپریشنز ٹیم کو مبارکباد دی ہے۔

واضح رہے کہ ہچیسن پورٹس پاکستان ملک میں واحد کنٹینر ٹرمینل ہے جس کی گہرائی 16.5 میٹر ہے اور یہ آسانی سے بڑے کنٹینر جہازوں سے ہینڈلنگ سرانجام دے سکتا ہے۔

 اس ٹرمینل پر 11 عدد ریموٹ کنٹرولڈ  کرینوں (quay cranes) اور 31 عدد ربر ٹائرڈ گینٹری کرینیں (RTGCs) نصب ہیں جنہیں ہچیسن پورٹس کے بہترین ٹرمینل کنٹرول سسٹم سے آپریٹ کیا جاتا ہے۔

پاکستان میں دستیاب سہولت کے ساتھ ، تاجروں کے پاس اب یہ اختیار موجود ہے کہ وہ مختلف جہاز رانی کمپنیوں کے آپریٹنگ گہرے ڈرافٹ جہازوں کے ساتھ اپنی کھیپوں میں تیزی لائیں جس سے مستقبل میں ان کے وقت اور رقم کی بچت ہوگی۔