پاکستان  نے کورونا وائرس سے بچاؤ کی احتیاطی تدابیر کے طور ر پر ماسک اور دستانوں کی برآمدگی پر پابندی لگانے کا فیصلہ کرلیا ہے۔

نیشنل ڈیزاسٹر مینجمنٹ اتھارٹی (این ڈی ایم اے)  کے مطابق ماسک اور دستانوں کی برآمدگی پر پابندی کا فیصلہ کورونا وائرس سے بچاؤ کے طور پر کیا گیا ہے۔

اس ضمن میں نیشنل ڈیزاسٹر مینجمنٹ اتھارٹی (این ڈی ایم اے)  نے متعلقہ وزارتوں اور صوبائی حکومتوں کو مراسلہ ارسال کر دیا ہے۔

مراسلے میں تمام وفاقی وزارتوں اور صوبائی حکومتوں کو آگاہ کر دیا ہےکہ  کورونا وائرس سے بچاؤکے  لیے ماسک اور دستانوں کا استعمال ناگزیر ہے۔ وائرس سے بچاؤکے  لیے ہر وقت ہر جگہ پر ضروری اسٹاک موجود ہونا چاہئیے۔

مراسلے میں مزید کہا گیا ہے کہ  تا حکم ثانی زمینی ،فضائی یا بحری راستوں سے ماسک اور دستانوں کی برآمدگی روکی جائے۔

این ڈی ایم اے نے آگاہ کیا کہ ملک بھر کے انٹرنیشنل  ایئر پورٹس پر بارہ ہزار سے زائد مسافروں کی اسکریننگ کی گئی ہے۔متعلقہ محکموں سے فوکل پوائنٹ اور ٹیلی فون نمبرز کا تبادلہ  بھی کیا گیا ہے۔

کورونا وائرس کا واحد علاج، دن میں پانچ باروضو

مراسلے میں بتایا گیا کہ نیشنل ایمرجنسی کنڑول سینٹر صورتحال پر نظر رکھے ہوئے ہیں۔اقوام متحدہ کے ادارے اور میڈیا کے ذریعے سے معلومات حاصل کی جا رہی ہیں۔

دوسری جانب کورونا وائرس کی تشخیص کے لیے جاپان کی جانب سے1000 سیمپلز کی کٹس پاکستان کو بھجوا دی  گئی ہیں۔

قومی ادارہ برائے صحت اسلام آباد کے لیب ڈویژن کے انچارج ڈاکٹرمحمد سلیمان کا کہناہے کہ جاپانی حکومت کی جانب سے کورونا وائرس کی تشخیص کے لیے کٹس بھجوادی گئی ہیں ،جس کے بعد وہ کم از کم ایک ہزار مشتبہ سیمپلز کی تشخیص کے قابل ہوگئے ہیں۔

واضح رہے کہ  کورونا وائرس سے  ہونے والی ہلاکتوں کی تعداد 200 سے تجاوز کرگئی ہےجبکہ متاثرہ افراد کی تعداد 10 ہزار تک پہنچ گئی ہے۔عالمی ادارہ صحت نے اسے عالمی ہنگامی صورتحال قرار دے دیا ہے۔