وفاقی وزیر برائے منصوبہ بندی اور خصوصی اقدامات اسد عمر نے کہا ہے کہ مسافروں کو معیاری سفری سہولیات کی فراہمی حکومت کی اولین ترجیحات ہیں۔

وفاقی وزیر برائے منصوبہ بندی اور خصوصی اقدامات اسد عمر کی زیر صدارت  ایم ایل ون منصوبے کے پی سی ون کی تیاری اور پروسیسنگ کی موجودہ صورتحال اور پاکستان ریلوے اسٹریٹجک پلان کا جائزہ اجلاس ہوا۔

اجلاس میں  منصوبے کی اہمیت کے ساتھ ساتھ اس منصوبے کے لئے درکار فنانسنگ کے پیمانے پر بھی غور کیا گیا۔

اجلاس میں بتایا گیا کہ ایم ایل ون  منصوبے کے لئے ایک فنانسنگ کمیٹی بھی تشکیل دی گئی ہے جو فنانسنگ کی شرائط و ضوابط کے سلسلے میں اس منصوبے پر عمل درآمد کے طریقوں پر غور کررہی ہے۔

وفاقی وزیر برائے منصوبہ بندی اور خصوصی اقدامات اسد عمر نے اجلاس میں کہا ہے کہ حکومت ملک میں ریلوے کے بنیادی ڈھانچے کو بہتر بنانے اور اپ گریڈ کرنے کی خواہاں ہے اور اس سلسلے میں ایم ایل ون سب سے اہم منصوبہ ہے

ریلوے کی بہتری کیلئے اقدامات کریں گے، وزیراعظم

ان کا کہنا تھا کہ استعداد کار میں بہتری ، مال بردار خدمات اور مسافروں کو معیاری سفری سہولیات کی فراہمی ہماری اولین ترجیحات ہیں۔

اجلاس سے خطاب میں اسد عمر نے بتایا کہ ملک بھر میں انفراسٹرکچر کی ترقی اور اپ گریڈ کے لئے ایک جامع حکمت عملی وضع کرنے اور ایک  مستقل سفری رابطوں کے خلا کو پُر کرنے کی ضرورت ہے اور ریلوے کو تیسری پارٹی کے جائزہ لینے کے کام میں  تیزی لانا چاہئے تاکہ منظوری کے لئے جلد سے جلد کارروائی کی جاسکے۔

اسد عمر نے فنانسنگ کمیٹی کو مزید کہا کہ وہ اپنے کام کو تیز کریں اور چینی فریق سے مستقل رابطہ میں رہیں تاکہ مالی اعانت کے  شرائط و ضوابط  کو حتمی شکل دی جاسکے۔

انہوں نے ایم او آر پر زور دیا کہ ریلوے کی بحالی اور اس کے مستقبل کے نظام اور نظام کی دیکھ بھال کے لئے ادارہ جاتی / تنظیمی اصلاحات ناگزیر ہیں۔ اس سلسلے میں ، ریلوے کو اصلاحات کا نفاذ کرنا چاہئے اور تنظیمی ڈھانچے کو بہتر بنانا چاہئے تاکہ زیادہ بڑے انفراسٹرکچر کو سنبھال سکیں۔

وزیر موصوف نے کہا کہ ایم ایل ون کے علاوہ کراچی سرکلر ریلوے بھی اسی شعبے میں ایک اہم منصوبہ تھا۔

انہوں نے کہا کہ حکومت ان دونوں منصوبوں کو حتمی شکل / نافذ کرنا چاہتی ہے۔