ملک میں پچھلے کئی ماہ سے جاری آٹے اور چینی بحران پر حکومت ایک بار پھر سرگرم ہوگئی جس پر تحقیقات کرتے ہوئے اس کے ذمیداران کا کھوج لگالیا گیا ہے۔

تفصیلات کے مطابق وزیراعظم عمران خان کی ہدایت پر ایک مرتبہ پھر ڈی جی ایف آئی کی سربراہی میں اعلی سطحی کمیشن نے چینی بحران پر دوبارہ تحقیقات شروع کردی ہیں جس کے بعد چینی کا بحران پیدا کرنے والوں کا پردہ فاش ہوگیا ہے۔

تحقیقاتی کمیشن نے موجودہ کین کمشنر پنجاب ندیم عباس بھنگو سے تفصیلات طلب کرلی گئی ہیں۔

حکومتی تحقیقاتی کمیٹی کی رپورٹ کے مطابق اڑھائی ماہ کے دوران عوام کی جیبوں پر بیس ارب روپے کا ڈاکہ ڈالا گیا جس میں انسٹھ روپے کلو تیار ہونے والی چینی عوام کو نوے روپے کلو تک فروخت کی گئی، منافع کے طور پر کمائی گئی رقم میں  سے پندرہ ارب حکومت لے گئی جبکہ تقریبا پانچ ارب شوگرمافیا کھا گیا۔

عوام کا معاشی تحفظ ہماری ذمہ داری ہے، فردوس عاشق اعوان

چینی کے حالیہ بحران میں شوگرملوں نے جنوری سے شروع ہونے والے کرشنگ سیزن کے دوران انتیس لاکھ میٹرک ٹن چینی تیار کی جو اڑھائی ماہ کے دوران نو لاکھ میٹرک ٹن سے زائد چینی فروخت کی گئی۔

تحقیقات کے مطابق سابق کین کمشنر پنجاب واجد علی شاہ سپورٹ کرتے رہے اور مافیا کو لوٹ مار کی کھلی چھٹی دی گئی تھی جس کی وجہ سے چینی کی اوسطا قیمت فروخت پچھتر روپے فی کلوگرام سے زائد رہی جبکہ چینی کی پیداواری لاگت انسٹھ روپے ستتر پیسے ہے۔

رپورٹ میں بتایا گیا کہ عوام کواوسطااسی روپے کلو چینی ملی جبکہ پندرہ روز تک قیمت نوے روپے فی کلوگرام بھی رہی تھی۔

رپورٹ کے مطابق سابق کین کمشنر پنجاب واجد علی شاہ کے دورمیں چینی بحران آیاجوابھی تک ڈائریکٹرفوڈ پنجاب ہیں، کین کمشنر پنجاب نے ایف آئی اے کی تحقیقاتی ٹیم کے ساتھ تعاون بھی نہیں کیا تھا۔

حکومتی تحقیقاتی کیٹی کی جانب سے پیش کردہ رپورٹ کے مطابق جہانگیرترین شوگرملوں نے چھیاسٹھ کروڑانتالیس لاکھ روپے کمائے، فاطمہ شوگرملز نے سولہ کروڑ ستاسی لاکھ، آدم شوگر ملز نے چھ کروڑ ستائیس لاکھ کمائے، اتحاد شوگرنے چارکروڑستاون لاکھ،رحیم یارخان شوگرنے بتیس کروڑتئیس لاکھ روپے منافع کمایا، تاندیلیانوالہ شوگرنے اڑتیس کروڑپچھترلاکھ اورفاطمہ شوگرنے سولہ کروڑستاسی لاکھ روپے کمائے، انڈس شوگرنے گیارہ کروڑدس لاکھ،شکرگنج شوگرنے بتیس کروڑاٹھائیس لاکھ کمائے، رمضان شوگرملز نے بیالیس کروڑچالیس لاکھ اورمدینہ شوگر ملز نے دس کروڑ انہتر لاکھ روپے کمائے، ہنزہ شوگرنے پانچ کروڑساٹھ لاکھ، ٹواسٹارشوگرنے چودہ کروڑبیاسی لاکھ اورشاہ تاج نے بارہ کروڑبانوے لاکھ کمائے اور : جے کے شوگر ملز نے بارہ کروڑسینتایس لاکھ روپے کمائے ہیں۔