اقتصادی رابطہ کمیٹی( ای سی سی )نے بجلی کے بلوں میں فیول ایڈجسٹمنٹ جون تک موخر کر دی۔

تفصیلات کے مطابق مشیر خزانہ کی زیر صدارت اقتصادی رابطہ کمیٹی کے اجلاس کا اعلامیہ جاری کردیا گیا۔

جاری کردہ اعلامیے کے مطابق  بجلی کے بلوں میں فیول ایڈجسٹمنٹ جون تک موخر کر دی گئی ہے۔فیول ایڈجسٹمنٹ کے موخر کرنے سے حکومت 151 ارب روپے کے اخراجات برداشت کرے گی۔

اقتصادی رابطہ کمیٹی نے چار ضمنی گرانٹس کی منظوری  بھی دے دی۔ ایف پی ایس سی کے لیے 16 کروڑ روپے کی سپلی مینٹری گرانٹ  منظور کرلی گئی۔

ای سی سی اجلاس میں  پائیدار ترقی کے پروگرام کے لیے ایک ارب 70 کروڑ کی ضمنی گرانٹ منظور کی گئی جبکہ اسپیشل سیکیورٹی ڈویژن جنوبی فیز 1 کے لیے 11ارب 48 کروڑ روپے کی گرانٹ منظور کی گئی۔

اس کے علاوہ  ایس سی او کے لیے 46 کروڑ 42 لاکھ روپے کی گرانٹ منظور کی گئی۔

ای سی سی نے انرجی سیکٹر پر کورونا وباء کے اثرات کا جائزہ لینے  کے لیے سیکرٹری خزانہ کی سربراہی میں کمیٹی قائم کردی۔کمیٹی انرجی سیکٹر کو ریلیف دینے  کےلیےسفارشات مرتب کرے گی۔

اجلاس میں 200 ارب کے پاکستان انرجی سکوک فیز ٹو کے لیے ویلوئیٹر کے تقرر کی منظوری دی گئی۔اجلاس میں تاپی گیس پائپ لائن منصوبے کے تحت گیس کی قیمتوں کے تعین  کے لیے بھی کمیٹی قائم کی گئی۔