کورونا وائرس کے پیش نظر کراچی میں تقریباً تین ماہ بند رہنے کے بعد ہیلتھ کلب اور جم کھلنے کا اعلان کردیا ہے۔

تفصیلات کے مطابق لاک ڈاون میں نرمی کے پیش نظر جم اور ہیلتھ کلب کے لئے سندھ حکومت نے ایس او پیز جاری کردیئے ۔

ایس او پیز کے مطابق جم میں صابن سے  ہاتھ دھونے یا سینیٹائز کرنے کی سہولت مہیا کرنا لازم ہے  ، جم کے اندر کھانسنے اور چھینکنے کے آداب اور احتیاطی تدابیر اپنائی جائیں۔

سندھ حکومت کی جانب سے جاری کردہ ایس او پیز کے مطابق عملے  اور ممبر دونوں کے لئے  سرجیکل ماسک پہننا اور سماجی فاصلہ برقرار رکھنا لازم ہے۔

ایس او پیز کے تحت  جم میں ہاتھ ملانے یا  گلے ملنے کی اجازت نہیں ، ممبرز ایک دوسرے سے 2 میٹر کا فاصلہ رکھیں جبکہ ایک ممبر کے استعمال کے بعد ورزش کی مشین  دوسرا ممبر 5 منٹ کے وقفے سے استعمال کرے گا۔

سندھ حکومت کی جانب سے جاری کردہ ایس او پیز کے مطابق ہر ممبر  کو زیادہ سے زیادہ 45 منٹ جم استعمال کرنے کے اجازت ہو گی ، جم میں حکومت کی  مہیا کردہ  احتیاطی تدابیر  نمایاں جگہ پر آویزاں کرنا لازم ہو گا۔

دوسری جانب جم سینٹرز نے شام پانچ کے بجائے رات نو بجے تک کھلے رکھنے کی درخواست کی ہے۔

ملازمین کی حاضری سے متعلق نوٹیفیکیشن جاری

سندھ باڈی بلڈنگ ایسوسی ایشن کے چئیرمین کا کہنا ہے کہ کورونا وائرس سے بچاؤ کے لیے احتیاطی طور پر جم بند کرنے پڑے تھے ، تین ماہ بعد اب سینٹرز کھلنے پر ان میں اسپرے کیا گیا جبکہ مشینوں کی بھی صفائی کی گئی اور جگہ جگہ سینٹائزر باکس بھی نصب کیے گئے۔

سندھ باڈی بلڈنگ ایسوسی ایشن کے چئیرمین کا مزید کہنا ہے کہ جم میں زیادہ تر افراد شام کو آتے ہے اس لیے حکومت سے درخواست کی گئی ہے اس لئے جم کو شام پانچ کے بجائے رات نو بجے تک کھولنے کی اجازت دی جائے۔