چیئرمین آل کراچی تاجر نے حکومت سے شہرقائد میں سیل کی گئی مارکیٹوں کو فوری کھولنے کا مطالبہ کردیا۔

تفصیلات کے مطابق چیئرمین آل کراچی تاجر حکیم شاہ نے حکومت سے شہرقائد میں سیل کی گئی مارکیٹوں کو فوری کھولنے کا مطالبہ کرتے ہوئے کہا کہ سیل کی گئی مارکیٹوں کو کھولنے کی مشروط اجازت دی جائے۔

حکیم شاہ نے کہا کہ تمام تاجر مارکیٹوں میں ایس او پیزکی پاسداری کریں گے، تاجرانتظامیہ کو یقین دہانی کرواتے ہیں کہ ایس او پیز کی خلاف ورزی نہیں ہوگی۔

چیئرمین آل کراچی تاجر حکیم شاہ نے مزید کہا کہ تاجر پہلے ہی بہت پریشان ہیں کاروبار بند ہونے سے مزید مشکلات کا سامنا ہے، حکومت سے اپیل ہے کہ بند مارکیٹوں  سے متعلق فیصلے پر نظرثای کرے۔

یاد رہے اس سے قبل کراچی میں تاجروں کی  جانب سے ایس او پیز کی خلاف ورزی پر ضلعی انتظامیہ  نے کارروائی کرتے ہوئے طارق روڈ سمیت دیگر علاقوں میں متعدد مارکیٹیں سیل کردیں تھی۔

ایس او اپیزکی خلاف ورزی، طارق روڈ سمیت متعدد مارکیٹیں سیل کردی گئیں

سیل کیے جانے شاپنگ سینٹرز میں عظمی شاپنگ سینٹر ، رفیع شاپنگ سینٹر، پی ایم سی شاپنگ سینٹر شامل ہیں۔

کمشنر کراچی افتخار شالوانی کا کہنا تھا کہ جب تک تاجر اور دکاندار ایس او پیز پر عمل نہیں کریں گے کارروائی جاری رہے گی۔

اس کے علاوہ  ایس او پی کی خلاف ورزی پر اسسٹنٹ کمشنرگارڈن اسماء بتول نے موتی والا مینشن بازار کو  بھی سیل کردیا تھا ۔

اسسٹنٹ کمشنر گارڈن  اسماء بتول کا کہنا تھا کہ بازارمیں نہ توسماجی فاصلہ تھا ، نہ ہی  سینیٹائزر، ماسک اور گلووز کا استعمال کیا جارہا تھا۔