اقتصادی رابطہ کمیٹی کی جانب سے ہیلتھ کیئر ورکرز کے لیے ایک اضافی تنخواہ رسک الاونس کی منظوری دے دی گئی ہے۔

تفصیلات کے مطابق وزیرخزانہ عبدالحفیظ شیخ کی صدارت میں اقتصادی رابطہ کمیٹی کا اجلاس ہوا ہے جس میں  12 نکاتی ایجنڈے پر غور کیا گیا۔

ذرائع کا کہنا ہے کہ احتساب بیورو کے قانونی معاملات کے لیے بھی فنڈز کی منظوری دیدی گئی جبکہ ہیلتھ کیئر ورکرز کے لیے ایک اضافی تنخواہ رسک الاونس کی منظوری بھی دے دی گئی ہے۔

ذرائع نے بتایا ہے کہ اقوام متحدہ امن مشن میں تعینات اہلکاروں کیلیے الاونس کی مد میں  16کروڑ 81لاکھ روپے کی تکنیکی گرانٹ کی منظوری دی گئی ہے جبکہ ای سی سی نے الیکٹرکل وہیکل پالیسی کی منظوری بھی دیدی گئی ہے۔

پالیسی 2 اور 3 وہیلرز اور ٹرکوں و بسوں سے متعلقہ ہے، پالیسی کے تحت ٹیرف اور ٹیکسوں میں کمی کی جائے گی جبکہ فور وہیلرز گاڑیوں سے متعلقہ پالیسی کی منظوری آئندہ اجلاس میں ہوگی

اجلاس میں مختلف وزارتوں کی سپلیمنٹری گرانٹس کی منظوری دی گئی جبکہ وزرات صحت کے لیے7ارب 24 کروڑ روپے سے زائد کی سپلیمنٹری گرانٹ کی منظوری بھی دے دی گئی ہے۔

ذرائع کا کہنا ہے کہ وزرات خارجہ کے بجٹ شارٹ فال کو کور کرنے کے لیے 3ارب 82کروڑ روپے کے اضافی فنڈز کی منظوری دی گئی ہے۔