صوبائی وزیر صنعت و تجارت میاں اسلم اقبال نے کہا ہے کہ صوبے بھر میں کل سے جس بازار میں ایس او پیز پرعمل نہ ہوا تو ایک دکان نہیں پورا بازار بند ہوگا۔

تفصیلات کے مطابق صوبائی وزیر صنعت و تجارت میاں اسلم اقبال نے نیوز کانفرنس کرتے ہوئے کہا ہے کہ تاجروں اور عوام نے مثبت رویہ نہ دکھایاتومکمل لاک ڈاون کی طرف جائیں گے اور ایس او پیز کی خلاف ورزی پر دکان نہیں پورا بازار سیل ہوگا۔

میاں اسلم اقبال کا کہنا تھا کہ کل سے ایس او پیز سختی سے عمل درآمد ہوگا، آج تاجروں کو واضح پیغام دے دیا گیا ہے جبکہ دکانوں کے اوقات کار صبح 9 سے شام 7 بجے ہو گے۔

انہوں نے بتایا کہ مارکیٹوں اور بازاروں میں ایس او پیز کی خلاف ورزی ہو رہی ہے اگر لوگوں کے روزگار کا معاملہ ہے تو پھر حالات خراب ہوں گے لیکن تجاوزات ہٹانا بھی ضروری ہیں اور ہم وہ کریں گے تاکہ لوگوں کو سہولت ہو اور کورونا بھی نہ پھیلے ۔

واضح رہے کہ اس سے قبل صوبائی وزیر صنعت و تجارت پنجاب میاں اسلم اقبال کی زیر صدارت تاجروں کیساتھ اجلاس ہوا جس میں  صوبائی وزیر میاں اسلم اقبال نے کہا ہے کہ حکومتی انسداد کورونا اقدامات کیخلاف ورزی پر زیرو ٹالرنس کا فیصلہ ہے اور مارکیٹوں میں کورونا حفاظتی اقدامات کیلئے کل سے ہائی لیول سررائز چیکنگ ہو گی۔

انہوں نے کہا کہ دکاندار اور خریدار کیلئے ماسک پہننا ضروری ہے اور کورونا سے متعلق حفاظتی اقدامات پر عمل نہ کرنے پر بازار سیل کر دئے جائیں گے۔

میٹنگ میں انہوں نے بتایا کہ تاجر تنظیموں کو اپنے وعدوں کے مطابق کورونا وائرس سے متعلق حفاظتی  اقدامات کرنا ہونگے کیونکہ تمام تاجر رہنماوں نے کورونا اقدامات پر ہمارے فیصلوں کی توثیق کی ہے۔

خیال رہے کہ اجلاس میں کمشنر لاہور سیف انجم سی سی پی او لاہور ذوالفقار حمید۔ڈی سی لاہور دانش افضال اورلاہور کی تمام تاجر تنظیموں کے راہنماوں نے شرکت کی۔