ملک بھر میں پٹرولیم مصنوعات کی قلت کے معاملے پر اوگرا کی جانب سے بیان جاری کیا گیا ہے۔

ترجمان اوگرا کا کہنا ہے کہ پیٹرولیم مصنوعات کی طلب و فراہمی کا تعلق اوگرا کے ساتھ نہیں ہے، آج قیمتیں بڑھ جائیں تو یہ قلت ختم کردیں گے۔

انہوں نے کہا کہ وزارت پٹرولیم اور اوگرا پٹرول کی فراہمی کی مسلسل مانیٹرنگ کر رہے ہیں اور آئل مارکیٹنگ کمپنیوں کو پٹرول کی فراہمی یقینی بنانے کی ہدایت بھی دی گئی ہے۔

ترجمان کا کہنا تھا پٹرول زخیرہ کرنے اور منافع خوروں کے خلاف سخت کارروائی کی جائے گی اور آئل مارکیٹنگ کمپنیوں کی جانب سے ایک دن میں پٹرول کی سپلائی معمول پر آنے کی یقین دہانی بھی کرائی گئی ہے۔

انہوں نے کہا ہے کہ آئل مارکیٹنگ کمپنیوں کی جانب سے تیل کی مقامی پیداوار اور بیرون ممالک سے درآمد شروع کر دی گئی ہے، وزارت پٹرولیم، اوگرا اور ایف آئی اے بندرگاہ پر تیل کی سپلائی کی مانیٹرنگ کر رہے ہیں۔

ترجمان کا کہنا ہے کہ انتظامیہ کو ہدایت کی گئی ہے کہ پٹرول کی قلت، ذخیرہ اندوزی اور پٹرول کی مہنگی فروخت کی شکایات پر کارروائی کریں اور خلاف ورزی کرنے والے پٹرول پمپس کو جرمانے اور لائسنس معطل کیے جائیں گے۔

انہوں نے کہا کہ 6 آئل کمپنیوں کو پٹرولیم مصنوعات کے مصنوعی بحران پر شوکاز نوٹس دیا گیا ہے جس کے بعد قانون کے تقاضوں کو مد نظر رکھتے ہوئے ایکشن ہوگا۔

ترجمان کا کہنا تھا کہ 3 کمپنیوں کے خلاف مصنوعی قلت پیدا کرنے کے ثبوت ہیں اور انہی 3 کمپنیوں کے خلاف سٹیزن پورٹل سے شکایت ملی تھیں۔

انہوں نے مزید بتایا کہ کیماڑی میں پٹرول ذخیرہ کرنے پر 2 کمپنیوں کے خلاف مقدمہ بھی درج کیا گیا ہے۔