انکم ٹیکس گوشوارے جمع کروانے کے لئے ایف بی آر کی جانب سے موبائل ایپ کا آغاز کردیا گیا ہے۔

فائلرز کو آسانی کے ساتھ اپنی ریٹرن فائل کرنے میں آسانی کے لئے فیڈرل بورڈ آف ریونیو (ایف بی آر) کی جانب سے انکم ٹیکس گوشوارے جمع کروانے کے لئے موبائل ایپلیکیشن کا آغاز کیا گیا ہے۔

ایف بی آر کے ترجمان کے مطابق آن لائن انکم ٹیکس گوشواروں کا فارم ایف بی آر کی ویب سائٹ پر دستیاب ہے۔

انہوں نے کہا کہ فی الحال یہ درخواست صرف انگریزی زبان میں دستیاب تھی لیکن بورڈ کی جانب سے اس ایپ کو اردو زبان میں بھی متارف کروانے پر غور کی جارہا ہے تا کہ زیادہ سے زیادہ لوگ اس سے سہولت سے فائدہ اٹھا سکیں۔

انہوں نے کہا کہ بورڈ کی جانب سے ہر بار فارم داخل کرتے وقت معلومات داخل کرنے میں صارفین کا وقت بچانے کے لئے پری فلر فارم بھی متعارف کرایا گیا ہے۔

ترجمان کا کہنا تھا کہ ایف بی آر نے اس سال لوگوں کی مشکلات اور کنفیوثرن کو مد نظر رکھتے ہوئے تمام درکار معلومات کو نہایت آسان فہم بنا دیا ہے جس کے بعد انکم ٹیکس گوشوارے نہایت آسانی کے ساتھ اسمارٹ فون کے ذریعے داخل کئے جا سکتے ہیں۔

انکم ٹیکس گوشوارے داخل کرنے پر ٹیکس گزاروں کی راہنمائی کے لئے اشتہاری کیمپین کی جائے گی جبکہ انکم ٹیکس گوشوارے داخل کرنے پر ٹیکس گزاروں کی راہنمائی کے لئےویڈیو ٹیوٹوریل بھی ویب سائٹ پر اپلوڈ کر دیا گیا ہے۔

ایف بی آر نے سسٹم اپ گریڈ کر دیا ہے اس لئے اب آخری تاریخ تک آسانی سے گوشوارے داخل کئے جا سکتے ہیں، ٹیکس گزار 30 ستمبر تک انکم ٹیکس گوشوارے داخل کر لیں۔