گیارہ سال میں گنے کی فی من قیمت میں صرف 75 روپے کا اضافہ کیا گیا۔

تفصیلات کے مطابق  پنجاب حکومت نے گنے کی خریداری کا ریٹ سال 20-21 میں فی من 200 روپے سرکاری سطح پر مقرر کر دیا اور محکمہ خوارک نے گنے کی قمیت خرید کا باقاعدہ نوٹیفکیشن بھی جاری کر دیا ہے۔

گنے کی دس سالہ قیمت سے متعلق رپورٹ ایوان وزیر اعلی کو ارسال کی گئی جس میں انکشاف ہوا ہے کہ دس سال میں گنے کی فی من قیمت میں صرف 75 روپے کا اضافہ کیا گیا ہے، پنجاب حکومت کی جانب سے دوہزار دس میں گنے کی فی من قیمت 125 روپے مقرر کی گئی تھی۔

رپورٹ کے مطابق 2010 سے 2011 کے دوران گنے کی فی من قیمت میں سب سے زیادہ اضافہ 25 روپے فی من کیا گیا جبکہ 2015 سے 2018 تک گنے کی فی من قیمت میں کسی قسم کا اضافہ نہیں کیا گیا۔

رپورٹ میں کہا گیا ہے کہ کسان کی زندگی بدلنے کے تبدیلی سرکار کے دعویداروں نے گنے کی فی من قیمت میں صرف 20 روپے کا اضافہ کیا گیا ہے۔

رپورٹ میں یہ بھی کہا گیا ہے کہ کوئی بھی شوگر مل اور گنا خریداری سنٹرز 200 فی من سے کم قیمت پر گنا نہیں خرید سکیں گےجبکہ گنے کے مقررہ ریٹ پر خریداری نہ کرنے یا کم قیمت دینے والوں کے خلاف شوگر فیکٹری آرڈیننس کے تحت کاروائی کی جائے گی۔

رپورٹ میں مزید کہا گیا ہے کہ پنجاب شوگر فیکٹری کنٹرول آرڈیننس کے تحت حکومتی ہدایات پر عملدرآمد نہ کرنے پر کم سی کم تین سال تک قید جبکہ 50 لاکھ تک یومیہ جرمانہ کیا جا سکتا ہے۔