ملک کی قومی اور نجی فضائی کمپنیوں نے عمرہ زائرین کے لیے سعودی عرب میں قرنطینہ پیکیجز کا انتخاب آسان کردیا ہے۔

سعودی عرب کی جانب سے یکم دسمبر سے پاکستانیوں کو براہ راست ملک میں داخلے کی اجازت ملنے کے بعد ہوائی کمپنیوں نے مسافروں کی سپولت کے لیے مختلف پیکیجز کا اعلان کردیا ہے۔ اس سلسلے میں مختلف ہوائی کمپنیوں کی ویب سائیٹس پر قرنطینہ پیکجزبک کرنے کی سہولت بھی موجود ہے۔ یہ پیکیج حجاز مقدس میں قیام اور طعام کی سہولیات کو مدنظر رکھتے ہوئے بنائے گئے ہیں۔ اسی وجہ سے مختلف شہروں کے ہوٹل قرنطینہ کے پیکجز مختلف ہیں۔

فضائی کمپنیوں کی انتظامیہ کا کہنا ہے کہ عمرہ زائرین کو ویب سائٹ کے ذریعے اپنی مرضی کا پیکج حاصل کرنے میں آسانی ہوگی اور موجودہ حالات کے پیش نظر ویکسین کے مطابق اپنا اپنا پیکج منتخب کرسکیں گے تاکہ عمرہ کرنے جانے والے سہولت اور آسانی کے ساتھ جا سکیں۔

پی آئی اے نے سعودی عرب جانے والے افراد کے لیے قرنطینہ پیکجز کے لئے اپنی ویب سائٹ پر پورٹل فراہم کیا ہے۔ جس کے تحت مدینہ منورہ میں تھری اسٹار ہوٹل اور قرنطینہ پیکج 2225 سعودی ریال جب کہ فور اسٹار ہوٹل اور قرنطینہ پیکیج 3125 سعودی ریال مقرر کئے ہیں۔

قومی ایئر لائن نے سعودی دارالحکومت ریاض کے لئے 1650 سعودی ریال اور قرنطینہ پیکج بک کرنے کی سہولت دی گئی ہے جبکہ ان تمام پیکجز میں ائیر پورٹ سے ہوٹل تک یکطرفہ ٹرانسپورٹ کی سہولت،رہائش،تین ٹائم کا کھانا اور دوکورنا پی سی آر ٹیسٹ شامل ہیں۔ پیکیج کے تحت پہلا کورونا پی سی آر ٹیسٹ ہوٹل پہنچنے پر جب کہ دوسرا قرنطینہ کے پانچ روز مکمل ہونے کے بعد لیا جائے گا۔

قومی ایئر لائن نے جدہ اور دمام کے تھری اسٹار ہوٹل اور قرنطینہ پیکیج 1825 سعودی ریال جب کہ فائیو اسٹار ہوٹل اور پانچ دن کا قرنطینہ پیکیج 3050 سعودی ریال مقرر کیا ہے۔