آئی سی ٹی کی برآمدی ترسیلات بشمول ٹیلی کمیونیکیشن، کمپیوٹر اور انفارمیشن سروسز جولائی تا نومبر مالی سال 2021-22 کے دوران 37.57 فیصد کی شرح نمو کے ساتھ 1.051 بلین ڈالر تک بڑھ گئی ہیں، جو کہ جولائی تا نومبر مالی سال 2020-21 کے دوران 764 ملین ڈالر تھیں۔

نومبر 2021 میں وزارت انفارمیشن ٹیکنالوجی اور ٹیلی کمیونیکیشن کے جاری کردہ اعداد و شمار کے مطابق نومبر 2020 کے مہینے کے 168 ملین ڈالر کے مقابلے میں آئی سی ٹی کی برآمدی ترسیلات 31.55 فیصد کی شرح نمو کے ساتھ 221 ملین ڈالر ہیں۔

گزشتہ ماہ اکتوبر 2021 کے دوران برآمدی ترسیلات زر سے 26 ملین ڈالر زیادہ ہیں، مالی سال 2021-22 جولائی تا نومبر کی مدت کے لیے خالص برآمدات 797 ملین ڈالر ہیں جو کہ 1.051 بلین ڈالر کی برآمدات کا 75.83 فیصد ہے۔

گزشتہ سال اسی مدت کے لیے خالص برآمدات 554 ملین ڈالر تھیں جو کہ 764 ملین ڈالر کی برآمدات کا 72.51 فیصد تھیں۔

وزارت ترجمان کا اس حوالے سے کہنا تھا کہ آئی ٹی اور ٹیلی کمیونیکیشن آئی ٹی کی برآمدات بڑھانے اور اس سلسلے میں خصوصی اقدامات کرنے کے لیے پرعزم ہے۔

وفاقی وزیر برائے آئی ٹی اور ٹیلی کمیونیکیشن سید امین الحق نے پی ایس ای بی کو ہدایت کی ہے کہ وہ آئی ٹی برآمدات کی ترسیلات زر کے ہدف کے حصول کے لیے ہر ممکن اقدام کرے۔

انہوں نے کہا کہ وزیر اعظم کے “ڈیجیٹل پاکستان” کے وژن کے تحت انفارمیشن ٹیکنالوجی سے متعلق تمام معاملات کو آگے بڑھانا اور نوجوانوں بالخصوص طلباء کو ڈیجیٹل دنیا سے جوڑنا بہت ضروری ہے۔

سید امین الحق نے کہا کہ وزارت آئی ٹی انفارمیشن ٹیکنالوجی کے ذریعے کوویڈ 19 وبائی مرض سے نمٹنے کے حوالے سے اہم کردار ادا کر رہی ہے۔

انہوں نے مزید کہا کہ ملک میں اب کورونا وائرس کے کیسز کم ہو رہے ہیں۔ حکومت کی طرف سے آئی ٹی انڈسٹری کی استعداد اور صلاحیت کو بڑھانے کے مختلف منصوبوں کے نتیجے میں صنعت کی ترقی کی شرح مضبوط ہوئی ہے۔