نیشنل الیکٹرک پاور ریگولیٹری اتھارٹی(نیپرا) نے بجلی کی قیمت  میں فی یونٹ 4 روپے 74 پیسے اضافے کا نوٹیفکیشن جاری کردیا ہے۔

جاری کردہ نوٹیفکیشن میں بتایا گیا ہے کہ  بجلی اکتوبر کی فیول پرائس ایڈجسٹمنٹ کے تحت مہنگی کی گئی ہے ۔صارفین سے اضافہ دسمبر کے بجلی بلوں میں وصول کیاجائے گا۔

نوٹیفکیشن  میں مزید کہا گیا ہے کہ اضافے کا اطلاق لائف لائن اور کے الیکٹرک صارفین پر نہیں ہوگا۔

دوسری جانب  وزارت توانائی کا ماہانہ فیول ایڈجسمنٹ سے متعلق  اپنے بیان میں کہنا ہے کہ  وزارت توانائی نے 22نومبر کو بجلی کی قیمت میں ماہانہ فیول ایڈجسمنٹ سے متعلق میڈیا خبروں کی وضاحت کی تھی۔

وزارت توانائی کے بیان میں کہا گیا ہے کہ نیپرا میں موجودہ درخواست صرف ایک مہینے کے دوران استعمال شدہ ایندھن (فیول) کی مد میں تھی جس پر آج نیپرا نے باقاعدہ سنوائی کے بعد فیصلہ دیا ہے۔

بیان میں مزید کہا گیا کہ یاد رہے کہ آج کے فیصلے کا بجلی کی قیمت پر کوئی مستقل اثر نہیں پڑے گا ۔ نیپرا ہر مہینے فیول پرائس ایڈجسمت کی عوامی سماعت کرتا ہے اور اس کے بعد بجلی کی قیمت میں مخصوص مدت  کے لیے فیول کی قیمت کا تعین کرتا ہے جوکہ مثبت یا منفی ہو سکتی ہے۔

وزارت توانائی کی جانب سے اس امر کی بھی وضاحت کی گئی کہ عالمی منڈی میں تیل اور دوسرے ایندھن کی قیمتوں  کا ماہانہ فیول پرائس ایڈجسمنٹ پر براہ راست اثر پڑتا ہے۔ آج کے نیپرا کے ماہانہ فیول ایڈجسمنٹ کے فیصلے کی بنیاد بھی عالمی مارکیٹ میں اکتوبر کے مہینے میں ایندھن کی قیمتوں میں اضافہ ہے۔