ملک بھر میں گیس بحران میں کمی نہ آسکی سردی آتے ہی گیس کی غیر اعلانیہ لوڈشیڈنگ جاری ہے۔

تفصیلات کے مطابق سردی کی شدت میں اضافہ ہونے کے بعد  کراچی، لاہور، اسلام آباد، راولپنڈی، کوئٹہ، پشاور، ملتان اور حیدر آباد سمیت ملک بھر میں گیس کا بحران مزید شدید ہوگیا، جو گیس 24 گھنٹوں میں کچھ دیر کے لیے آتی تھی اب وہ بھی آنا بند ہو گئی۔

صبح ہو یا شام گیس بحران نے لوگوں کواذیت میں مبتلا کردیا ہے، کراچی کے مختلف علاقوں میں گیس لوڈ شیڈنگ اور گیس پریشر میں کمی کے باعث عوام پریشان ہیں، صنعتوں کو گیس بند کرنے کے باوجود گھریلو صارفین کو گیس فراہم نہیں کی جارہی۔

کورنگی ، شاہ فیصل ، صدر، رنشور لائن ، گارڈن کے کچھ علاقوں میں گیس لود شیڈنگ کا سامنا ہے جبکہ جوہر، گلزار ہجری، لیاقت آباد، ایف بی ایریا میں بھی گیس غائب ہے۔

شہریوں کا کہنا ہےکہ صبح دفترجاتے وقت گیس نہیں ہوتی، شام کے وقت گھر واپس آئیں تو بھی گیس نہیں ہوتی،حکومت گیس فراہمی کو یقینی بنائے۔

دوسری جانب سردی کی شدت میں مزید اضافے کے بعد لاہور کے باغبانپورہ، کوآپریٹواسٹور، مرغزارکالونی، سبزہ زار، مدینہ کالونی سمیت دیگر علاقوں میں گیس پریشر میں شدید کمی ہوگئی ہے جبکہ کچھ علاقوں میں گیس بالکل غائب ہوگئی ہے۔

شہری گیس نہ ہونے کی وجہ سے پریشان ہے اور سوئی ناردرن گیس حکام نے چپ سادھ لی، گیس کی قلت پر تبصرہ کرنے سے انکار کر دیا ہے۔

اس کے علاوہ اوکاڑہ اور دیگر مضافات میں گیس کی غیراعلانیہ لوڈشیڈنگ جاری ہے، گیس پریشر نہ ہونے کے باعث خواتین کو شدید مشکلات کا سامنا ہے۔

شہری کا کہنا ہے کہ رات کو دس بجے سے لیکر صبح پانچ بجے تک ہمارے گیس بند رہتی ہے، دن بھر گیس پریشر بالکل نہیں ہوتا بچے اسکول بھوکے جاتے ہیں۔

گیس بند ہونے کے بعد لکڑیوں اور گیس سلینڈر کی قیمتیں آسمان پر چلی گئی ہیں، لائنوں میں لگ کر لوگ سلینڈر بھروانے پر مجبور ہیں۔