پہلے 7 ماہ میں ترسیلات زر  میں 9.1 فیصد اضافہ ریکارڈ کیا گیا ہے۔

وزارت خزانہ   کی جانب سے ملکی معیشت پر ماہانہ اپ ڈیٹ آؤٹ لک رپورٹ جاری کردی گئی۔

رپورٹ کے مطابق   پہلے 7 ماہ میں ترسیلات زر 9.1 فیصد اضافے سے 18 ارب ڈالرز ریکارڈ کی گئیں۔

ملکی برآمدات 27.4 فیصد اضافے سے 17.7 ارب ڈالرز کی سطح تک پہنچ گئیں جبکہ  ملکی درآمدات 55.1 فیصد اضافے سے 42.8 ارب ڈالرز کی سطح تک پہنچ گئیں۔

رپورٹ میں بتایا گیا ہے کہ کرنٹ اکاونٹ خسارے میں 11.6 ارب ڈالرز کا اضافہ ریکارڈ کیا گیا ہے۔

براہ راست غیر ملکی سرمایہ کاری  11.3 فیصد اضافے سے 1.16 ارب ڈالرز رہی۔ پورٹ فولیو سرمایہ کاری مثبت رجحان کے ساتھ 958.3 ملین ڈالرز ہو گئی۔

مجموعی غیر ملکی سرمایہ کاری مثبت رجحان کے ساتھ 1817.3 ملین ڈالرز  کی سطح تک پہنچ گئی۔

زرمبادلہ  کے ذخائر فروری کے تیسرے ہفتے تک 22.99 ارب ڈالرز ہوگئے۔

اسٹیٹ بینک  کے ذخائر 16 ارب 58 کروڑ ڈالرز اور کمرشل بینکوں کے ذخائر 6.40 ارب ڈالر زرہے۔

ڈالر کی شرح تبادلہ 176.16 روپے فی ڈالر کی سطح پر پہنچ گئی۔

رپورٹ کے مطابق چھ ماہ میں ٹیکس ریونیو 30.3 فیصد اضافے سے 3351 ارب روپے رہا۔ جولائی سے دسمبر میں نان ٹیکس آمدنی 14.6 فیصد کمی سے 764.9 ارب رہی ۔

جولائی تا دسمبر تک پی ایس ڈی پی کی مد میں 566.3 ارب روپے منظور کیے گئے۔ جولائی سے دسمبر تک مالیاتی خسارہ بڑھ کر 1371 ارب روپے کی سطح تک پہنچ گیا ۔

 پہلے 7 ماہ میں زرعی قرضے 3.4 فیصد اضافے سے 740.3 ارب روپے کی سطح پر رہے ۔

جنوری میں مہنگائی کی ماہانہ شرح 13 فیصد ریکارڈ کی گئی۔ پہلے 7 ماہ میں مہنگائی کی سالانہ شرح 10.3 فیصد ریکارڈ کی گئی۔

بڑی صنعتوں کی شرح نمو دسمبر میں 6.4 فیصد تک رہی  جبکہ  جولائی سے دسمبر کے دوران  شرح نمو 7.4 فیصد تک رہی

اسٹاک ایکسچینج انڈیکس 45 ہزار 132 پوائنٹس تک پہنچ گیا۔