محکمہ ریلوے نے 10 ٹرینوں کی کمرشل مینجمنٹ 8 ارب 95 کروڑ میں نیلام کر دی۔

نجی شعبے نے 19 مسافر ٹرینوں کی کمرشل مینجمنٹ کے لئے مجموعی طور پر 17 ارب 10 کروڑ 64 لاکھ روپے کی بڈ جمع کرائی، ریلوے انتظامیہ نے 10 ٹرینوں کی بڈز کو تسلیم کر لیا ہےـ۔

نیلامی کے عمل سے مجموعی طور پر 8 ارب 95 کروڑ کی رقم حاصل ہوگی۔

ریلوے حکام نے کامیاب اداروں کو لگائی گئی بولی کی 10 فی صد رقم بطور ایڈوانس ایک ماہ میں جمع کرانے کی ہدایت کر دی ہے۔

محکمہ ریلوے نے جن مسافر ٹرینوں میں کمرشل مینجمنٹ نیلام کی ہے ان میں گرین لائن، شالیمار ایکسپریس اور تیزگام جیسی کامیاب ٹرینیں شامل ہیں۔

سرکاری دستاویزات میں راولپنڈی سے کراچی چلنے والی گرین لائن کی کمرشل منیجمنٹ 2 ارب 5 کروڑ، 20 لاکھ، تیزگام 2 ارب 6 کروڑ 70 لاکھ اور شالیمار ایکسپریس ایک ارب 73 کروڑ 60 لاکھ روپے میں نیلام ہوئی ہے۔

بہاؤالدین زکریا ایکسپریس کی کمرشل انتظامیہ ایک ارب 25 کروڑ 20 لاکھ روپے، سبک خرام ریلوے کار،راول ایکسپریس اور تھل ایکسپریس 33،33 کروڑ روپے میں نیلام ہوئی۔

محکمہ ریلوے کو موسی پاک ریل کار کی کمرشل منیجمنٹ کی نیلامی سے 26 کروڑ 80 لاکھ روپے، موئنجوداڑو ایکسپریس سے 9 کروڑ روپے اور راوی ایکسپریس سے 3 کروڑ 90 لاکھ روپے حاصل ہوں گے۔

واضح رہے کہ محکمہ ریلوے مجموعی طور پر 33 ٹرینوں کی کمرشل مینجمنٹ نجی شعبے کو آؤٹ سورس کرنے کا ارادہ رکھتی ہے۔