حکومت  نے عوام  کے لیے بڑے ریلیف پیکج کا اعلان  کردیا۔

تفصیلات کے مطابق  وزیر خزانہ شوکت ترین کی زیر صدارت اقتصادی رابطہ کمیٹی ( ای سی سی ) کا اجلاس ہوا جس  میں مختلف وزارتوں کی سمریز پر غور کیا گیا۔

ای سی سی کی جانب سے جاری کردہ اعلامیے میں بتایا گیا ہے کہ   وزیراعظم کے اعلان کے مطابق بجلی  کے نرخوں میں 5 روپے فی یونٹ ریلیف کی منظوری  دے دی گئی ہے۔ یہ ریلیف مارچ سے جون 2022ء تک چار ماہ  کے لیے دیا جائے گا۔

ای سی سی نے اوورسیز پاکستانیوں  کے لیے کامیاب اوورسیز پروگرام کی منظوری  بھی دے دی۔

اجلاس میں  کم آمدن تارکین وطن  کے لیے سود سے پاک قرضے فراہم  کرنے کی منظوری بھی دی گئی ۔ پروگرام کے تحت 10 ہزار 180 افراد کو 3 لاکھ تک قرض فراہم کیا جائے گا۔

اعلامیے میں بتایا گیا کہ وزیراعظم ریلیف پیکیج کے تحت 136 ارب روپے کی سہولت فراہم کی جائے گی۔

اجلاس میں 8.28 ارب کے رمضان ریلیف پیکیج کی منظوری بھی  دی گئی  ۔ یوٹیلیٹی اسٹورز پر 19 اشیائے ضروریہ پرسبسڈی دی جائے گی۔

ای سی سی نے امپورٹ سینڈ ایکسپورٹ پالیسی آرڈر 2020ء میں ترامیم کی منظوری  بھی دے دی۔

ای سی سی کی توغ گیس فیلڈ سے ایس این جی پی ایل کو 16 ایم ایم بی ٹی یو گیس فراہمی کی منظوری ہے۔

اعلامیے میں کہا گیا ہے کہ  وزیراعظم کے پیٹرولیم ریلیف کے تحت آئل مارکیٹنگ کمپنیزکو قیمتوں کا فرق حکومت ادا کرے گی۔

اجلاس میں او آئی سی کے وزرائے  خارجہ اجلاس  کے لیے 42.89 کروڑ کے فنڈز کی فراہمی کی منظوری بھی دے دی گئی۔

ای سی سی  نے تخفیف غربت و سماجی بہبود ڈویژن  کے لیے 4.75 کروڑ کی گرانٹ کی  بھی منظوری دی۔ نیا پاکستان سرٹیفیکیٹس پر اصل اور سود کی ادائیگی کے لیے 135 ارب کی سپلیمنٹری گرانٹ کی  بھی منظوری دی گئی۔