حکومت نے ڈیزل کی قلت پر نوٹس لیتے ہوئے ذمہ داران کے خلاف سخت کارروائی کا فیصلہ کرلیا۔

تفصیلات کے مطابق سیکرٹری پیٹرولیم علی رضا بھٹہ کی زیر صدارت اعلیٰ سطحی ورچوئل اجلاس ہوا  جس میں اوگرا،پی ایس او حکام اور تیل مارکیٹنگ کمپنیز کے نمائندوں نے شرکت کی۔

ذرائع کے مطابق اجلاس میں بریفنگ کے دوران بتایا گیا کہ ملک میں پیٹرولیم مصنوعات کے مطلوبہ ذخائر موجود ہیں۔21 دنوں کا ڈیزل اور 31 دنوں  کا پیٹرول کا مطلوبہ ذخیرہ موجود ہے ۔

ذرائع وزارت توانائی کا کہنا ہے کہ  ڈیزل مہنگا ہونے کی افواہوں پر مصنوعی قلت پیدا کی گئی، ڈیزل کی قیمتوں میں ممکنہ طور پر 52 روپے فی لیٹر اضافے کا امکان ہے جس کی وجہ سے ذخیرہ اندوزی کا انکشاف ہوا ہے۔

اجلاس میں ذخیرہ اندوزوں کیخلاف سخت کارروائی کا فیصلہ کرتے ہوئے  چاروں صوبوں کے چیف سیکریٹریز کو چھاپے مارنے کی ہدایات جاری کردی گئی ہیں۔

یہ بھی پڑھیں: پیٹرول اور ڈیزل پر سبسڈی نہیں دے سکتے قیمتوں پر نظر ثانی ہوگی، مفتاح اسماعیل

ذرائع کا کہنا ہے کہ ذخیرہ اندوزی میں ملوث ڈیلرز کے لائسنس منسوخ کر دیئے جائینگے۔

چیف سیکریٹریز کو ہدایت کی گئی ہے کہ  ڈیزل کے مجاز ڈیلرز کے اسٹاک  کی چیکنگ اور مانیٹرنگ سخت کی جائے اور  ڈیزل کی سپلائی چین کو مستحکم رکھنے کو یقینی بنایا جائے۔

ذرائع کا کہنا ہے کہ اس وقت ملک میں تیل کمپنیز کے دس ہزار کے لگ بھگ مجاز ڈیلرز ہیں۔  بغیر لائسنس ڈیلرز کی تعداد لا محدود ہے  جن کا  حکومت کے پاس کوئی ڈیٹا نہیں ہے  ،بغیر لائسنس ڈیلرز نے بڑے پیمانے پر ڈیزل کی ذخیرہ اندوزی کی ہے۔

ذرائع کا مزید کہنا تھا کہ  گندم کی کٹائی کی وجہ سے ڈیزل کی طلب میں اضافہ ہوا ہے ۔ڈیزل کی یومیہ کھپت 23 ہزار سے بڑھ کر 33 ہزار ٹن ہو گئی ہے۔ ڈیزل کی کھپت میں اضافے کی وجہ سے سپلائی  بھی متاثر ہوئی ہے۔

ذرائع نے کہا کہ  ڈیزل کی مصنوعی قلت میں سیاسی مخالفت کا عنصر بھی شامل ہے۔