صدر پاکستان ڈاکٹر عارف علوی نے ایف بی آر کو غیر رجسٹرڈ چینی ڈیلرز کو ٹیکس نیٹ میں لانے کی ہدایت کردی۔

تفصیلات کے مطابق  صدر مملکت نے فیڈرل بورڈ آف ریونیو (ایف بی آر) کو ٹیکس  وصولی بڑھانے  کے لیے چینی کے بڑے خریداروں اور غیر رجسٹرڈ  ڈیلرز کو ٹیکس نیٹ میں  لانے کی ہدایت کی ہے۔

ڈاکٹر عارف علوی نے کہا کہ ایف بی آر کے پاس ڈیٹا کی دستیابی کے باوجود بھاری مقدار میں چینی کے خریدار ٹیکس نیٹ سے باہر ہیں ۔ چینی کے غیر رجسٹرڈ خریدار ٹیکس ادائیگی کی قومی ذمہ داری ادا نہیں کررہے ۔

دوسری جانب صدر مملکت نے ایف بی آر کی وفاقی ٹیکس محتسب کی ہدایات کے خلاف درخواست  بھی مسترد کردی کردی۔

وفاقی ٹیکس  محتسب نے پرائیویٹ شوگر ملز سے چینی کے غیر رجسٹرڈ خریداروں کو ٹیکس نیٹ میں لانے  کے لیے تحقیقات کا آغاز کیا تھا۔

تحقیقاتی رپورٹ کے مطابق گزشتہ چار سالوں کے دوران ملز نے مختلف غیر رجسٹرڈ خریداروں کو 2.7 ارب روپے کی چینی فراہم کی۔ صرف تین خریداروں کے پاس قومی ٹیکس نمبر تھا، ایف بی آر نے ٹیکس کا دائرہ بڑھانے پر توجہ نہیں دی۔

یہ بھی پڑھیں: یوٹیلٹی اسٹوروں پر چینی آٹے اور گھی کی قیمت میں کمی

رپورٹ میں مزید کہا گیا کہ   شوگر ملز  کے پاس چینی کی سپلائی  اور خریداروں کا ریکارڈ ہوتا ہے ۔ ایف بی آر شوگر ملز کے ڈیٹا کا تجزیہ کرنے اور لوگوں کو ٹیکس نیٹ میں شامل کرنے میں ناکام رہا ۔

محتسب نے چیف کمشنر،ایل ٹی او  کراچی کو ہدایت کی کہ وہ غیر رجسٹرڈ افراد کو ٹیکس نیٹ میں شامل کریں۔

ایف بی آر نے وفاقی ٹیکس محتسب کے حکم کے خلاف صدر  مملکت کے پاس درخواست دائر کی تھی۔

صدر مملکت نے کہا کہ  ایف بی آر کی فیلڈ فارمیشنز غیر رجسٹرڈ خریداروں کی معلومات اکٹھی کرنے میں چوکس نہیں   ہے۔ ایف بی آر ملز کے ماہانہ سیلز ٹیکس گوشواروں پر مطمئن ہیں، ڈیٹا کی جانچ نہیں کی جا رہی ۔

عارف علوی نے مزید کہا کہ ایف بی آر کی فیلڈ فارمیشنز شوگر ملز کے ڈیٹا کا بروقت تجزیہ کرکے خریداروں کی تفصیلات حاصل کر سکتی ہیں۔ ایف بی آر کی اپنے فرائض کی ادائیگی میں سنگین غفلت اور نااہلی بدانتظامی کے مترادف ہے۔

ان کا کہنا تھا کہ  ٹیکس ادائیگی بڑھانے کے لیے محتسب کی سفارشات کو پوری چینی کے شعبے پر لاگو کیا جائے ۔ ایف بی آر 60 دنوں میں ٹیکس محتسب کو عملدرآمد کی جامع رپورٹ پیش کرے ۔