کے الیکٹرک نے شدید گرمی میں کراچی کے شہریوں کی جان اور صحت سے کھیلنا شروع کردیا ۔

تفصیلات کے مطابق  شہر میں لوڈ شیڈنگ اور مینٹیننس کے نام پر بجلی کی بندش نے شہریوں کا برا حال کردیا ہے۔

شہر قائد میں شدید گرمی اور ہیٹ ویو کے باوجود متعدد علاقوں میں مینٹیننس کے نام پر گھنٹوں بجلی بند کردی گئی ۔کئی علاقوں میں مینٹیننس کے علاوہ 14 گھنٹے تک کی لوڈ شیڈنگ کی جارہی ہے۔

 کے الیکٹرک نے گزشتہ روز مینٹیننس کے نام پر بجلی بند نہ کرنے کا اعلان کیا تھا  تاہم ایک  روز بعد ہی صبح 8 بجے سے مختلف علاقوں میں مینٹیننس کے نام پر بجلی بند کردی گئی۔

گزشتہ روز ترجمان کے الیکٹرک عمران رانا نے کہا تھا کہ کراچی میں ہیٹ ویو کی لہر کے پیش نظر کے الیکٹرک کی جانب سے صارفین کو زیادہ سے زیادہ ریلیف دینے کے لیے اقدامات کیے جارہے ہیں۔

شدید موسم کے پیش نظر شہر میں کسی بھی قسم کے مینٹیننس شٹ ڈاؤن کو فوری طور پر معطل کر دیا گیا ہے۔

دوسری جانب شہر میں لوڈشیڈنگ سے مستثنیٰ علاقوں میں بھی گھنٹوں غیر اعلانیہ لوڈ شیڈنگ کی جارہی ہے۔ لوڈشیڈنگ والے علاقوں میں دن میں چار  مرتبہ ساڑھے تین سے چار گھنٹے کی لوڈشیڈنگ کی جارہی ہے۔

نارتھ کراچی، شادمان ٹاؤن، سر سیدٹاؤن، نصرت بھٹو کالونی، اسکیم 33، گلستان جوہر، شاہ فیصل کالونی، گلشن اقبال، گلشن معمار میں لوڈشیڈنگ جاری  ہے۔

اس کے علاوہ احسن آباد، اورنگی ٹاؤن ، تیسر ٹاؤن، سرجانی ،کورنگی، بھنس کالونی، گارڈن ،رامسوامی، لیاری، اولڈ سٹی ایریا، لانڈھی، کیماڑی، منوڑہ، ماڈل کالونی، معین آباد اور ایئرپورٹ کے علاقوں میں بھی طویل  لوڈ شیڈنگ جاری ہے۔

نیشنل گرڈ سے اضافی بجلی ملنے کے باوجود کے الیکٹرک شہر کی ڈیمانڈ پوری کرنے میں ناکام ہے۔ کے الیکٹرک کے تمام گرڈ اسٹیشن اوور لوڈ ہو گئے ہیں۔