انٹربینک میں ڈالر کاروباری ہفتے کے تیسرے روز بھی تاریخ کی بلند ترین سطح پر پہنچ گیا۔

فاریکس ڈیلرز کے مطابق آج ٹریڈ کے دوران انٹربینک میں ڈالر کی قدر میں 1روپے 84پیسے اضافہ ہوا جس کے بعد ڈالر 207 روپے کی بلند ترین سطح پر فروخت ہورہا تھا تاہم اب 1 روپے 30 پیسے اضافے کے بعد 206 روپے 46 پیسے پر بند ہوا ہے۔

Interbank closing #ExchangeRate for todayhttps://t.co/5WvqJcimxu pic.twitter.com/s79fz42ZrW

— SBP (@StateBank_Pak) June 15, 2022

خیال رہے کہ گزشتہ روزڈالر 205.16 روپےکی سطح پربند ہواتھا۔

جبکہ اوپن مارکیٹ میں ڈالر 1روپے 50پیسے اضافہ سے ڈالر 208روپے پر ٹریڈ ہورہا ہے۔

یاد رہے کہ موجودہ حکومت کے صرف تین ماہ میں ڈالر 24 روپے 07  روپے مہنگا ہوچکا ہے۔

واضح رہے کہ خسارے اور زرِ مبادلہ کے کم ہوتے ہوئے ذخائر کی وجہ سے پاکستان میں روپے کی قدر میں بھی مسلسل کمی کا سلسلہ جاری ہے اورڈالر میں اضافے کے باعث ملکی قرضوں میں 2400ارب روپے اضافہ ہوگا ہے۔

معاشی ماہرین کے مطابق کرنسی کی قدر میں غیر معمولی اتار چڑھاؤ سے برآمد کنندگان اور درآمد کنندگان کو شدید پریشانی کا سامنا ہے جب کہ بیرونی سرمایہ کاروں پر بھی اسکے منفی اثرات مرتب ہورہے ہیں۔

کرنسی ڈیلرز کے مطابق اسٹیٹ بینک کے گورنر رضا باقر کے جانے اور اس کے بعد مستقل گورنر کی تعیناتی نہ ہونے کے باعث بھی ایسا لگ رہا ہے کہ اسٹیٹ بینک کا انٹر بینک میں کنٹرول کمزور ہوگیا ہے جس کا فائدہ اٹھایا جارہا ہے۔