کراچی: کاروباری ہفتے کے دوسرے روز بھی ملک میں ڈالر کی اونچی اڑان تاحال جاری ہے انٹر بینک میں ڈالر 212 روپے ہوگیا۔

انٹر بینک میں روپے کی قدرمزید کم ہوئی گئی ، انٹر بینک میں ڈالر 2 روپے 40 پیسے کا اضافہ ہوا جس سے ایک ڈالر 212  روپے کی بلند ترین سطح پر ٹریڈ کرتا رہا۔

اس کے علاوہ اوپن مارکیٹ میں بھی ڈالر کی قدر میں اضافہ ہوا اور انٹربینک کے مقابلے میں اوپن مارکیٹ میں  ڈالر کی تاریخ کی نئی بلندیوں تک پہنچ گیا اور ایک امریکی ڈالر 213 روپے پر خریدا اور 215 پر فروخت ہورہا تھا۔

کاروبار کے اختتام پر انٹر بینک میں ڈالر 211 روپے 48 پیسے پر بند ہوگیا، 11 اپریل 2022 سے اب تک انٹر بینک میں ڈالر 28 روپے 55 پیسے مہنگا ہوا جب کہ ڈالر کی قدر میں اضافے سے ملکی قرضوں میں 3600 ارب روپے کا دباؤ بڑھ گیا ہے۔

دوسری جانب اوپن مارکیٹ میں ڈالر 1 روپے 50 پیسے مہنگا ہوا اور کاروبار کے اختتام پر اوپن مارکیٹ میں ڈالر 215 روپے پر بند وہا۔ 11 اپریل سے اب تک اوپن مارکیٹ میں ڈالر 30 روپے 50 پیسے مہنگا ہوچکا ہے۔

واضح رہے کہ گزشتہ روز انٹر بینک میں ڈالر 1 روپے 21 پیسے کا اضافہ ہوا جس سے ایک ڈالر 209  روپے 96 پیسے پربند ہوا تھا۔

وزیر  داخلہ رانا ثنااللہ نے بیان میں کہا کہ پیٹرول کی قیمت بڑھانے کے باوجود آئی ایم ایف نے اب تک معاہدہ جاری رکھنے پر دستخط نہیں کیے، ڈالر کی قیمت بڑھنے کی وجہ صرف اور صرف آئی ایم ایف سے معاہدے میں تاخیر ہے  لہٰذا جیسے ہی آئی ایم ایف سے معاہدہ ہوجائے گا تو ڈالر کو 182 پر لے آئیں گے ۔

خیال رہے کہ خسارے اور زرِ مبادلہ کے کم ہوتے ہوئے ذخائر کی وجہ سے پاکستان میں روپے کی قدر میں بھی مسلسل کمی کا سلسلہ جاری ہے اورڈالر میں اضافے کے باعث ملکی قرضوں میں اضافہ ہورہا ہے۔

معاشی ماہرین کے مطابق کرنسی کی قدر میں غیر معمولی اتار چڑھاؤ سے برآمد کنندگان اور درآمد کنندگان کو شدید پریشانی کا سامنا ہے جب کہ بیرونی سرمایہ کاروں پر بھی اسکے منفی اثرات مرتب ہورہے ہیں۔