روپے کے مقابلے امریکی ڈالر کی قدر میں ہفتے کے چوتھے روز بھی مسلسل چڑھاؤ جاری ہے اور ڈالر ملکی تاریخ کی بلند ترین سطح 227 روپے پر پہنچ گیا۔

انٹر بینک مارکیٹ میں ڈالر 1 روپے 89 پیسے مہنگا ہوا جس کے بعد انٹر بینک میں ڈالر 224 روپے 92 پیسے سے بڑھ کر 226 روپے 81 پیسے کی بلند ترین سطح پربند ہوا ہے۔

Interbank closing #ExchangeRate for todayhttps://t.co/UvkvZjtlJ4 pic.twitter.com/KWQwiIEdpC

— SBP (@StateBank_Pak) July 21, 2022

 اوپن مارکیٹ میں بھی انٹر بینک کی طرح ڈالر 3 روپے 50 مہنگا ہوا جس کے بعد اوپن مارکیٹ میں ڈالر 225 سے 228 روپے پرپہنچ گی ہے۔

یاد رہے گزشتہ روز بھی پاکستانی روپے کے مقابلے میں امریکی ڈالر 2 روپے 93پیسے مہنگا ہو کر 224 روپے 92 پیسے پر بند ہوا تھا۔

واضح رہے کہ اس سے قبل جون میں امریکی ڈالر 211 روپے 48 پیسے کی سطح پر پہنچا تھا، جبکہ شہباز حکومت کے آنے کے بعد سے اب تک ڈالر 51 روپے سے زائد مہنگا ہوا ہےجبکہ صرف 4 روز کے دوران ڈالر انٹر بینک میں 14 روپے سے زائد مہنگا ہوا۔

وزیر خزانہ مفتاح اسماعیل نے گزشتہ روز پریس کانفرنس کرتے ہوئے کہا تھا کہ گذشتہ مالی سال 80 ارب ڈالر کی درآمدات ہوئیں جس کی وجہ سے روپے پر دباؤ رہا جبکہ مارچ میں درآمدی بل میں کمی آئی اور جون میں بھی کمی ہوئی۔

روپے کی گراوٹ پر اسٹیٹ بینک نے جاری بیان میں کہا تھا کہ روپے کی قدر میں کمی کا سبب عالمی سطح پر امریکی ڈالر کی قدر میں اضافہ بھی ہے، گذشتہ 6 ماہ میں عالمی سطح پر ڈالر کی قدر 12 فیصد بڑھی ہے، جو ڈالر کی 20 سال کی بلند ترین سطح ہے۔

چئیرمین فاریکس ایسوسی ایشن ملک بوستان نے کہا کہ ملک میں سیاسی حالات کو جواز بنا کر بینک ڈالر کی قیمت میں سٹہ بازی کررہے ہیں جس کا اسٹیٹ بینک کو نوٹس لینا چاہیے۔