وفاقی حکومت نے آئی ایم ایف کی شرط پر دوبارہ بجلی بم گرانے کی تیاری شروع کردی ہے۔

وفاقی حکومت نے بجلی کا بنیادی ٹیرف 7 روپے 91 پیسے بڑھانے کی درخواست نیپرا میں دائر کردی ہے۔

نیشنل الیکٹرک پاور ریگولیٹری اتھارٹی (نیپرا) کی جانب سے وفاقی حکومت کی درخواست پر کل سماعت ہوگی، نیپرا سماعت کے بعد فیصلہ نوٹیفیکشن کیلئے وفاقی حکومت کو بھجوائے گی۔

وفاقی حکومت نے بجلی کا بنیادی ٹیرف مرحلہ وار بڑھانے کا پلان تیار کیا ہے جس میں کے الیکٹرک سمیت تمام ڈسکوز کیلئے بجلی کا بنیادی ٹیرف بڑھانے کی تجویز ہے۔

نیپرا کی درخواست میں موقف اختیار کیا گیا ہے کہ جولائی سے بجلی 3 روپے 50 پیسے فی یونٹ مہنگی کی جائے, نیپرا نے اگست سے بجلی مزید 3 روپے 50 پیسےفی یونٹ مہنگی کرنے کی سفارش کی ہے۔

نیپرا کی جانب سے اکتوبرسےبجلی کےبنیادی ٹیرف میں 91 پیسےفی یونٹ بڑھانےکی درخواست بھی کی گئی ہے۔

واضح رہے کہ نیپرا نے بجلی کا بنیادی ٹیرف بڑھانے کا فیصلہ وفاقی حکومت کو بھجوایا تھا، وفاقی حکومت نے اب یکساں ٹیرف کیلئے نیپرا میں درخواست دائر کی ہے۔

یہ بھی یاد رہے کہ آئی ایم ایف نے کہا ہے کہ پاکستان کو آئی ایم ایف ایگزیکٹیو بورڈ اجلاس سے قبل تمام ترجیحی نکات پرعمل کرنا ہوگا، آئی ایم ایف پاکستان میں توانائی کی قیمتوں کے حوالے سے واضح پالیسی چاہتا ہے۔

 نیپرا کے فیصلوں پر فوری عمل درآمد آئی ایم ایف کے اسٹاف لیول معائدے کا حصہ ہے، جس میں نیپرا کو  فیول ایڈجسٹمنٹ کے فیصلے پر بلا تاخیر عمل کرنے کی ہدایت ہے۔