کے الیکٹرک نے  مہنگی بجلی  کا ذمہ دار ایس ایس جی سی   کو قرار دے دیا۔

تفصیلات کے مطابق سوئی سدرن گیس کمپنی (ایس ایس جی سی ) کی جانب سے  گیس کی سپلائی میں کمی کے خلاف کے الیکٹرک کی درخواست پر سماعت ہوئی۔

کے الیکٹرک نے مہنگی بجلی کا ذمہ دارسوئی سدرن گیس کمپنی (ایس ایس جی سی ) کو قرار دیتے ہوئے کہا کہ   گیس کی کمی سے بجلی کی پیداوار متاثر ہو رہی ہے۔

کے الیکٹرک کے وکیل نے کہا کہ  کراچی کا ہر شہری بلز میں اضافے کی شکایات کر رہا ہے۔ہمیں عدالتی حکم کے باوجود قدرتی گیس نہیں دی جا رہی  جبکہ متبادل ذرائع کے اخراجات 8 گناہ ہیں۔

وکیل کا مزید کہنا تھا کہ  کراچی کا ہر شہری فیول ایڈجسمنٹ سے متاثر ہو رہا ہے۔ہمارے علاوہ باقی انڈسٹریز کو گیس دی جا رہی ہے۔

کے الیکٹرک کے وکیل نےعدالت سے درخواست کی کہ  ایم ڈی ایس ایس جی سی عمران منیر کے خلاف توہین عدالت  کی کارروائی کی جائے۔

ایس ایس جی سی کے وکیل نے عدالت کو بتایا کہ ادارے کے ایم ڈی عمران منیر ملک سے باہر ہیں جس پر عدالت نے کہا کہ  ایم ڈی سے کہیں جواب جمع کرائیں، اگر جواب جمع نہ کرایا تو ذاتی حیثیت میں طلب کریں گے۔

عدالت نے کیس کی مزید سماعت 8 ستمبر تک کے لیے ملتوی  کرتے ہوئے حکم امتناعی میں بھی توسیع کردی۔

وکیل کے الیکٹرک کا کہنا ہے کہ عدالت ایم ڈی سوئی سدرن گیس کمپنی عمران منیر کو توہین  عدالت نوٹس جاری کر چکی ہے۔

ان کا کہنا تھا کہ  عدالت نے 13 جون 2018 کو ایس ایس جی سی کو گیس کی کمی سے روکا اور  معمول کے مطابق گیس کی سپلائی جاری رکھنے کی ہدایت کی تاہم  حکم امتناعی کے باوجود گیس کی سپلائی میں کمی کی گئی۔