ایشیائی ترقیاتی بینک نے سری لنکا کے بعد پاکستانی معیشت کو زبوں حال قرار دیتے ہوئے خطرے کی گھنٹی بجادی ہے۔

ایشیائی ترقیاتی بینک کی جانب سے ایشیاء کی ترقیاتی آؤٹ لک رپورٹ جاری کی گئی ہے جس میں جنوبی ایشیاء میں سری لنکا کے بعد پاکستانی معیشت کو زبوں حال قرار دیا گیا ہے۔

رپورٹ کے مطابق روپے کی قدر میں کمی اور ڈالر کے ریٹ میں اضافے سے پاکستان کا جنوبی ایشیاء میں دوسرا نمبر ہے جب کہ مانیٹری پالیسی اور شرح سود میں اضافے سے پاکستان دوسرے نمبر پر آگیا ہے۔

رپورٹ میں کہا گیا ہے کہ پاکستان میں 10 ماہ کے اندر مہنگائی کی شرح میں دگنا اضافہ ہوا، جنوری 2022 میں مہنگائی کی شرح 13 فیصد اور اکتوبر 2022 میں 26.6 فیصد ریکارڈ کی گئی۔

پاکستان میں سیلاب کی وجہ سے معیشت کو نقصان ہوا اور مہنگائی ڈبل ڈیجیٹ میں چلی گئی جب کہ پاکستان میں سیلاب سے زراعت اور لائیو اسٹاک کو بڑا نقصان پہنچا۔

آؤٹ لک رپورٹ کے مطابق سری لنکا میں مہنگائی کے بڑھنے کی شرح 70.6 فیصد ہے جب کہ بنگلا دیش میں مہنگائی کے بڑھنے کی شرح 8.9 فیصد اور بھارت میں مہنگائی کے بڑھنے کی شرح 6.8 فیصد ہے۔

ایشیائی ترقیاتی بینک نے پاکستانی روپے کی قدر میں مزید گراوٹ کی پیش گوئی کی ہے جب کہ انہوں نے خدشہ ظاہر کیا ہے کہ پاکستان میں توانائی مزید مہنگی ہوسکتی ہے۔