اسلام آباد: نگران حکومت نے 400 یونٹ تک بجلی استعمال کرنے والے صارفین کو ریلیف دینے کا فیصلہ کیا ہے۔

نگران وزیراعظم انوار الحق کاکڑ کی زیر صدارت وفاقی کابینہ کا آج اجلاس ہوا جس میں جولائی کے ماہ کے بجلی کے بلوں میں ممکنہ ریلیف کا جائزہ لیا گیا۔

ذرائع کے مطابق وزارت خزانہ کی جانب سے اجلاس میں موقف اختیار کیا گیا کہ آئی ایم ایف معاہدہ کے باعث بجلی پر سبسڈی کی صورت میں عوام کو ریلیف فراہم کرنا ممکن نہیں۔

توانائی ڈویژن کی جانب سے کابینہ اجلاس میں عوام کو ریلیف فراہم کرنے سے متعلق مختلف آپشنز پیش کیے گئے۔

ذرائع کا کہنا ہے کہ اجلاس میں اتفاق کیا گیا کہ 400 یونٹ تک بجلی استعمال کرنے والے صارفین سے آئندہ چھ ماہ کے دوران اقساط میں بل وصول کیے جائیں گے لیکن ایسا صرف آئی ایم ایف کی رضامندی سے ممکن ہوگا۔

ذرائع کا مزید کہنا ہے کہ وزارت خزانہ اس بارے میں آئی ایم ایف سے رابطہ کرے گی جب کہ کابینہ نے توانائی ڈویژن کو طریقہ کار طے کرنے کی ہدایت کردی ہے۔

دوسری جانب واپڈا، تقسیم کار کمپنیوں اور متعلقہ اداروں کے ملازمین کو دیے جانے والے مفت بجلی کے یونٹس پر فیصلہ بھی نہیں ہوسکا۔

ذرائع نے بتایا کہ اسلام آباد ایئرپورٹ کی آؤٹ سورسنگ کا معاملہ اسٹیرنگ کمیٹی کے سپرد کردیا گیا ہے۔

ذرائع نے یہ بھی بتایا کہ وفاقی کابینہ نے ہانگ کانگ اگزامینیشن اتھارٹی سے معاہدے، پاکستان اور سعودی عرب کے مابین ووکیشنل ٹریننگ سے متعلق مفاہمت کی یادداشت سمیت پاکستان اور بیلاروس کے درمیان مفاہمت کی یادداشت پر دستخط کی منظوری دے دی ہے۔

علاوہ ازیں اجلاس کے دوران وفاقی کابینہ نے چیئرمین متروکہ وقف املاک کی مدت ملازمت میں توسیع کی منظوری بھی دے دی ہے۔

حالات حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں