کراچی: نگران وزیراعظم انوارالحق کاکڑ سے ملاقات کے باوجود تاجر تنظیموں نے احتجاج جاری رکھنے کا اعلان کیا ہے۔

تفصیلات کے مطابق گورنر ہاؤس کے باہر تاجر رہنماؤں نے دو ٹوک اعلان کیا ہے کہ آج کرچی کی تمام تاجر تنظیمیں احتجاج اعلان کردہ شیڈول کے مطابق کریں گی۔

تاجر رہنما شرجیل گوپلانی نے کہا کہ وزیراعظم سے صرف ان تاجروں کی ملاقات کرائی گئی جو گورنر سندھ کے منظور نظر تھے، جو لوگ بولنے والے تھے ان کو بولنے نہیں دیا گیا۔

انہوں نے کہا کہ ہم نے وزیر اعظم کو آگاہ کر دیا ہے تاجر بجلی کے بل ادا نہیں کریں گے، آج ہم اپنا احتجاج کریں گے اور ہماری بات نہ مانی گئی تو احتجاج کا دائرہ وسیع کریں گے۔

دوسری جانب رضوان عرفان نے بتایا کہ وزیر اعظم سے ملاقات کا وقت پہلے دس بجے تھا، پھر گیارہ اس کے بعد بارہ بجے ملاقات ہوئی، وزیر اعظم نے تاجروں کو کہا ہے کہ وہ تحریری تجاویز دیں۔

انہوں نے کہا کہ تحریری تجاویز میں کتنا وقت لگے، تاجروں کو فوری ریلیف چاہیے، فوری ریلیف نہ ملنے کے سبب تاجر اپنا احتجاج جاری رکھیں گے۔

اس موقع پر تاجر رہنما روف ابراہیم نے کہا کہ جب تک ہمارا مقصد پورا نہیں ہوتا احتجاج جاری رہے گا۔

اس کے علاوہ عتیق میر نے کہا کہ وزیر اعظم نے وعدہ کیا ہے کہ کمیٹی بنا کر بجلی کے بلوں پر کچھ بوجھ کم کریں گے، یہ صرف وعدے کی حد تک ہے، جب تک عمل نہیں ہوتا احتجاج جاری رہے گا۔

تاجر رہنما جمیل پراچہ نے شکوہ کیا کہ وزیر اعظم انوارالحق کاکڑ نے تمام تاجروں سے بات بھی نہیں کی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔