اسلام آباد: رواں مالی سال ترسیلات زر، برآمدات، درآمدات اور کرنٹ اکاؤنٹ خسارے میں کمی ریکارڈ کی گئی ہے۔

تفصیلات کے مطابق رواں مالی سال کی پہلی سہ ماہی کی ماہانہ معاشی آؤٹ لک رپورٹ جاری کردی گئی ہے جس میں بتایا گیا ہے کہ ایف بی آر محصولات، نان ٹیکس آمدنی اور مہنگائی میں اضافہ ریکارڈ کیا گیا جبکہ بڑی صنعتوں کی پیداوار، اسٹاک ایکسچینج انڈیکس، اور ڈالر کی قدر میں بھی اضافہ ہوا ہے۔

معاشی آؤٹ لک رپورٹ کے مطابق گزشتہ مالی سال کی پہلی سہ ماہی کے مقابلے میں رواں مالی ترسیلات زر میں 19.8 فیصد کی کمی ہوئی جبکہ گزشتہ مالی سال کے پہلے تین ماہ میں 7.9 ارب ڈالر کی ترسیلات زر موصول ہوئیں اور رواں مالی سال کی پہلی سہ ماہی میں 6.3 ارب ڈالر کی ترسیلات زر موصول ہوئیں۔

رپورٹ میں بتایا گیا ہے کہ رواں مالی سال برآمدات میں 5 فیصد اور درآمدات میں 23.8 فیصد کی کمی ہوئی جبکہ گزشتہ سال 7.4 ارب ڈالر کی برآمدات کے مقابلے میں رواں سال 7 ارب ڈالر کی برآمدات ہوئیں۔

معاشی آؤٹ لک رپورٹ میں کہا گیا کہ کرنٹ اکاؤنٹ خسارے میں گزشتہ مالی کے مقابلے میں 58.1 فیصد کمی ہوئی جبکہ رواں مالی سال براہ راست بیرونی سرمایہ کاری میں 15 فیصد اضافہ ریکارڈ کیا گیا۔

رپورٹ کے مطابق گزشتہ مالی سال کے مقابلے میں رواں مالی سال اسٹیٹ بینک کے مالی ذخائر میں اضافہ ہوا جبکہ گزشتہ مالی سال سٹیٹ بینک کے مالی ذخائر 7 ارب ارب 36 کروڑ 80 لاکھ ڈالر تھے، تاہم رواں مالی سال 7 ارب 49 کروڑ ڈالر کے مالی ذخائر ریکارڈ کیے گئے۔

 رپورٹ میں کہا گیا کہ ایف بی آر محصولات میں 25 فیصد اور نان ٹیکس آمدنی میں 114.7 فیصد کا اضافہ ہوا جبکہ رواں مالی سال مالی خسارے میں گزشتہ مالی سال کے مقابلے میں 17.6 فیصد اضافہ ہوا۔

علاوہ ازیں گزشتہ مالی سال کی پہلی سہ ماہی میں 25.1 فیصد مہنگائی ریکارڈ کی گئی تھی جبکہ رواں مالی سال کی پہلی سہ ماہی میں 29 فیصد مہنگائی ریکارڈ کی گئی۔

رپورٹ میں بتایا گیا ہے کہ ایک سال میں ڈالر کی قدر میں 59.02 روپے کا اضافہ ہوا جبکہ لارج اسکیل مینوفیکچرنگ میں 2.5 فیصد اضافہ ریکارڈ کیا گیا، اس کے علاوہ رواں مالی سال کپاس کی پیداوار میں 126.6 فیصد اور چاول کی پیداوار میں 18 فیصد اضافہ ہوا۔

معاشی آؤٹ لک رپورٹ میں مزید کہا گیا کہ معیشت میں بہتری کے مثبت اثرات سامنے آرہے ہیں، آنے والے مہینوں میں معیشت بہتری کی جانب گامزن ہونے کا امکان ہے جبکہ روپے کی قدر میں بہتری اور مہنگائی میں بھی مزید کمی کا امکان ہے۔

پاکستان میں معاشی بحران کیسے پیدا ہوا؟

پاکستان میں حالیہ سیلاب کے تناظر میں ہنگامی امداد، بحالی اور تعمیرنو پر جنرل اسمبلی کو غیر رسمی بریفنگ میں اقوام متحدہ کے سیکرٹری جنرل انتونیو گوتریس نے کہا ہے کہ پاکستان میں سیلاب سے بڑے پیمانے پر نقصانات ہوئے اور پاکستان کو نقصانات کے ازالے کے لیے عالمی برادری کے تعاون کی ضرورت ہے۔

   انہوں نے کہا کہ تباہ کن سیلاب کی وجہ سے پاکستان میں بدترین معاشی بحران پیدا ہوا اور عالمی اداروں کو سیلاب کے بعد پاکستان سے کیے وعدے پورے کرنے چاہئیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں