اسلام آباد: پاکستان کی خوراک کی برآمدات میں بڑا اضافہ سامنے آگیا ہے۔

دستاویز کے مطابق رواں مالی سال جولائی تا اکتوبر پاکستان نے 759 ارب 54 کروڑ روپے سے زیادہ کی خوراک کی اشیاء برآمد کیں جبکہ گزشتہ مالی سال اسی عرصے میں 428 ارب 77 کروڑ روپے سے زیادہ کی خوراک کی اشیاء برآمد تھیں۔

دستاویز میں بتایا گیا ہے کہ رواں مالی کے پانچ ماہ میں 320 ارب 59 کروڑ روپے سے زیادہ کے چاول برآمد کیے گئے جبکہ گزشتہ مالی سال اسی عرصے میں 166 ارب 72 کروڑ روپے کے چاول برآمد کیے گئے۔

اس کے علاوہ رواں مالی سال کے پانچ میں 82 ارب 55 کروڑ روپے کے باسمتی چاول برآمد کیے گئے، تاہم گزشتہ مالی سال اسی عرصے میں 51 ارب 27 کروڑ روپے سے زیادہ کے چاول برآمد کیے گئے تھے۔

دستاویز کے مطابق رواں مالی سال مچھلی کی درآمدات میں بھی اضافہ ریکارڈ کیا گیا، جولائی تا نومبر 46 ارب 63 کروڑ روپے سے زیادہ کی مچھلی کی برآمدات ہوئیں جبکہ گزشتہ مالی سال اسی عرصے میں مچھلی کی کل برآمدات 41 ارب 47 کروڑ سے زیادہ تھیں۔

رواں مالی سال جولائی تا نومبر گوشت کی کل برآمدات 56 ارب 32 کروڑ روپے کی رہیں جبکہ گزشتہ مالی سال اسی عرصے میں 35 ارب 77 کروڑ روپے کا گوشت برآمد کیا گیا۔

دستاویز میں مزید بتایا گیا کہ رواں مالی کے پانچ ماہ میں پھلوں کی برآمدات میں بھی اضافہ ریکارڈ کیا گیا، جولائی تا نومبر 36 ارب 82 کروڑ روپے سے زیادہ کے پھل برآمد کیے گئے، جبکہ گزشتہ مالی سال اسی عرصے میں پھلوں کی کل برآمدات 24 ارب 67 کروڑ روپے سے زیادہ تھیں۔