اسلام آباد: عالمی مالیاتی فنڈ (آئی ایم ایف) کا کہنا ہے کہ آئی ایم ایف پالیسیوں کا بروقت نفاذ اہم ہیں جس سے پیچھے ہٹنے کی کوئی گنجائش نہیں۔

تفصیلات کے مطابق آئی ایم ایف ایگزیکٹیو بورڈ کی جانب سے پاکستان کیلئے 70 کروڑ ڈالر قرض کی منظوری دیدی گئی ہے جس کا اعلامیہ بھی جاری کر دیا گیا ہے۔

اعلامیے میں آئی ایم ایف کا کہنا تھا کہ پاکستان میں معاشی سرگرمیاں مستحکم ہوئی ہیں،پاکستان کی آؤٹ لک اب بھی چیلنجنگ ہے اور درست پالیسیوں کے نفاذ کی ضرورت ہے، آئی ایم ایف پالیسیوں کا بروقت نفاذ اہم ہیں جس سے پیچھے ہٹنے کی گنجائش نہیں۔

آئی ایم ایف کی جانب سے جاری کردہ اعلامیے کے مطابق پاکستان کی شرح نمو رواں سال 2 فیصد رہنے کا امکان ہے جبکہ مہنگائی جون 2024 تک 18.5 فیصد رہنے کی توقع ہے۔

آئی ایم ایف نے کہا ہے کہ مالی ذخائر دسمبر 2023 میں بڑھ کر 8.2 ارب ڈالر ہوگئے جو جون میں 4.5 ارب ڈالر تھے، مہنگائی میں کمی کیلئے اقدامات کی ضرورت ہے۔

اعلامیے میں مزید بتایا گیا کہ پاکستان نے بجلی اور گیس کے نرخوں کے حوالے سے چیلنجنگ اقدامات کیے ہیں، نادار طبقے کو مہنگائی متاثر کیا ہے اسٹیٹ بینک مہنگائی پر قابو پانے کیلئے اقدامات کرے۔

آئی ایم ایف نے اعلامیے میں مزید کہا کہ روزگار کے مواقع اور سماجی تحفظ کیلئے مزید اقدامات کی ضرورت ہے، حکومتی ملکیتی اداروں میں اصلاحات اور انسداد بدعنوانی کے اداروں کو مضبوط کرنا ضروری ہے۔

گزشتہ روز آئی ایم ایف ایگزیکٹو بورڈ نے پاکستان کیلئے 70 کروڑ ڈالر قرض کی منظوری دے دی تھی، تاہم اس سے قبل اقتصادی جائزے کی تکمیل پر اسٹاف لیول معاہدہ 15 نومبر کو طے پایا تھا، پاکستان کو قرض پروگرام میں سے 1.2 ارب ڈالر پہلے ہی مل چکے ہیں۔

یاد رہے کہ آئی ایم ایف سے 70 کروڑ ڈالر ملنے سے جاری کردہ رقم 1.9 ارب ڈالر ہو جائے گی۔