اسلام آباد: جولائی تا ستمبر 2024 کے دوران پاکستانی برآمدات میں 14 فیصد سے زائد اضافہ ریکارڈ کیا گیا ہے۔

ادارہ شماریات کے مطابق ملکی برآمدات میں پہلی سہہ ماہی جولائی تا ستمبر 2024 کے دوران 14.61 فیصد کا اضافہ ریکارڈ ہوا اور پاکستانی برآمدات کا حجم 7 ارب 90 کروڑ ڈالر سے تجاوز کرگیا۔

ادارہ شماریات نے بتایا کہ ٹیکسٹائل برآمدات 9.51 فیصد اضافے سے 4.52 ارب ڈالر ریکارڈ کی گئی، غذائی اشیاء کی برآمدات 26 فیصد اضافے سے 1 ارب 61 کروڑ ڈالر رہیں جب کہ مینوفیکچرنگ آلات کی برآمدات 7.77 فیصد اضافہ سے 1 ارب ڈالر سے تجاوز کرگئیں۔

ادارہ شماریات کا کہنا ہے کہ مچھلی، دالوں، بیجوں اور خشک میوہ جات، خام کپاس، سوتی دھاگہ، قالین، لیدر گارمنٹس کی برآمدات میں کمی آئی جب کہ جولائی تا ستمبر کینوس فٹ ویئر، الیکٹریکل مشینری اور گڑ کی برآمدات بھی کم ہوئیں۔

رپورٹ میں یہ بھی بتایا گیا ہے کہ چاول، چینی، پھل، سبزیوں، تمباکو اور گوشت کی برآمدات بڑھ گئیں جب کہ کارپٹ، کھیلوں کا سامان، لیدر مصنوعات، فٹ ویئر اور سرجیکل آلات بھی بڑھنے والی برآمدات میں شامل ہیں۔

ادارہ شماریات کا مزید کہنا تھا کہ پیٹرولیم، کوئلے، کھاد، کیمیکلز، پلاسٹک مٹیریل، آٹو پارٹس، ٹائرز، قیمتی جواہرات اور جیولیری کی برآمدات میں بھی اضافہ ہوا۔