اسلام آباد: ملکی غذائی اجناس کی برآمدات میں مسلسل چوتھے ماہ بھی بڑا اضافہ ریکارڈ کیا گیا ہے۔

ادارہ شماریات کی دستاویز کے مطابق اکتوبر میں ملکی غذائی اجناس کی برآمدات میں سالانہ 12.77 فیصد اضافہ ہوا جب کہ غذائی اجناس کی برآمدات کا حجم 74 کروڑ 84 لاکھ ڈالر ریکارڈ ہوا۔

چاول کی برآمدات

دستاویز میں بتایا گیا ہے کہ اکتوبر میں چاول کی برآمدات میں سالانہ 19.03 فیصد اضافہ ریکارڈ کیا گیا اور 6 لاکھ 4 ہزار میٹرک ٹن سے زائد چاول ایکسپورٹ کیے گئے جب کہ چاول کی برآمدات سے 36 کروڑ 23 لاکھ ڈالر سے زائد زرمبادلہ آیا۔

سبزیوں کی برآمدات

اکتوبر میں سبزیوں کی برآمدات میں سالانہ 23.38 فیصد اضافہ ہوا اور تقریباً 56 ہزار میٹرک ٹن سبزیاں بیرون ممالک ایکسپورٹ کی گئیں، سبزیوں کی برآمدات سے ایک کروڑ 93 لاکھ ڈالر سے زائد زر مبادلہ آیا۔

پھلوں کی برآمدات

اکتوبر میں پھلوں کی برآمدات میں سالانہ 20.30 فیصد اضافہ ہوگیا، تقریبا 54 ہزار میٹرک ٹن پھل بیرون ممالک بھجوائے گئے جن کی برآمدات سے ایک ماہ میں 2 کروڑ 44 لاکھ ڈالر سے زائد زرمبادلہ آیا۔

تمباکو کی برآمدات

ایک ماہ میں ملکی تمباکو کی برآمدات میں سالانہ 565 فیصد اضافہ ریکارڈ ہوا، 6 ہزار 238 میٹرک ٹن تمباکو بیرون ممالک ایکسپورٹ کیا گیا اور تمباکو کی برآمدات سے 2 کروڑ 83 لاکھ ڈالر زرمبادلہ کمایا گیا۔

خشک میوہ جات کی ایکسپورٹ

اکتوبر میں پاکستان نے 88 ہزار ٹن سے زائد خشک میوہ جات ایکسپورٹ کیے، خشک میوہ جات کی برآمدات سے 9 کروڑ 47 لاکھ ڈالر زرمبادلہ آیا۔

غذائی اجناس کی برآمدات

رواں مالی سال پہلے 4 ماہ میں غذائی اجناس کی برآمدات میں 21.73 فیصد اضافہ ہوا اور جولائی تا اکتوبر غذائی اجناس کی برآمدات کا حجم 2 ارب 36 کروڑ 51 لاکھ ڈالر رہا۔