اسلام آباد: تجارتی تعاون میں وسعت دیتے ہوئے پاکستان اور ترکیہ کے درمیان 21 نئے معاہدے ہوگئے۔

وزیر تجارت جام کمال خان اور ترک وزیر تجارت عمر بولات کی اسلام آباد میں ملاقات ہوئی جس دوران دونوں ممالک نے تجارتی اور سرمایہ کاری تعلقات مزید مضبوط کرنے پر اتفاق کیا۔

وزیر تجارت جام کمال خان نے کہا کہ پاکستان ترکیہ کا دوسرا گھر ہے جب کہ ترک وزیر تجارت نے کہا کہ صدر اردوان اور وزیراعظم شہباز شریف کے قریبی تعلقات سے دوطرفہ تعاون کو فروغ ملا۔

پاکستان اور ترکیہ نے ترجیحی تجارتی معاہدہ (PTA) کو مؤثر بنانے پر غور کیا، ڈی-8 ترجیحی تجارتی معاہدے کی بحالی اور استحکام پر تبادلہ خیال کیا۔

وزیر بولات نے بتایا کہ ترکیہ کی کمپنیاں پاکستان میں مزید سرمایہ کاری کے لیے تیار ہیں جب کہ پاکستانی مصنوعات کی ترکیہ میں نمائش کے لیے ’’میڈ ان پاکستان‘‘ ایکسپو کی تجویز دی گئی۔

ترکیہ پاکستانی باسمتی چاول کی برآمدات بڑھانے کے لیے اقدامات کرے گا، پاکستان نے ترکیہ کو اپریل میں ہونے والی ہیلتھ کیئر اینڈ انڈسٹریل ایکسپو میں شرکت کی دعوت دی۔

دفاعی تعاون میں اضافہ جب کہ ترکیہ اور پاکستان مشترکہ پیداوار اور ٹیکنالوجی کے تبادلے پر متفق ہیں۔لاہور میں 26-28 فروری کو فوڈ ٹیک ایکسپو، پاکستان-ترکیہ تجارتی تعاون کا نیا موقع ہے۔

استنبول میں ترکیہ کی فیشن اور فرنیچر نمائشیں یورپی منڈیوں کی جگہ لے رہی ہیں جب کہ پاکستان اور ترکیہ نے تجارتی، اقتصادی اور دفاعی تعاون مزید وسعت دینے کا عزم کیا۔