اسلام آباد: وزیراعظم شہباز شریف نے کاٹن کی تیزی سے گرتی پیداوار پر اظہار تشویش کرتے ہوئے 15 رکنی کمیٹی تشکیل دے دی۔

وزیراعظم محمد شہباز شریف نے پاکستان میں کپاس کی پیداوار میں تیزی سے کمی پر گہری تشویش کا اظہار کیا ہے اور اس مسئلے کے حل کے لیے فوری اقدامات کی ضرورت پر زور دیا جب کہ وزیراعظم نے کپاس کی فصل کو سہارا دینے اور اس کی بحالی کے لیے 15 رکنی کمیٹی تشکیل دی ہے۔

کمیٹی کی قیادت وفاقی وزیر فوڈ سیکیورٹی کریں گے اور اسے 30 دنوں میں تجاویز پیش کرنے کی ہدایت کی گئی ہے۔ کمیٹی میں پی پی ایم این اے حسین طارق جاموٹ، لمز سے ڈاکٹر احسن رضا، سابق وزیر اور سابق چیئرمین پی اے آر سی بھی شامل ہیں۔

کمیٹی کا پہلا اجلاس 13 مارچ کو منعقد کیا جائے گا جس میں کپاس کی پیداوار میں اضافے کے لیے تکنیکی تجاویز، روئی کی گانٹھوں کی درجہ بندی کو بہتر بنانے اور بین الاقوامی معیار کے مطابق کپاس کی پیداوار کو فروغ دینے کے لیے سفارشات تیار کی جائیں گی۔

کمیٹی کا مقصد اور چیلنجز

کمیٹی کا مقصد ملک بھر میں کپاس کی پیداوار کو بڑھانا اور اس صنعت میں آلودگی کے پیرامیٹرز کا جائزہ لینا ہے۔ کمیٹی کپاس کے کاشتکاروں کے مسائل حل کرنے اور ٹیکسٹائل صنعت کے لیے معیاری پیداوار کے اقدامات پر غور کرے گی۔

اس میں سندھ، پنجاب اور بلوچستان کے کپاس کے کاشتکار اور محکمہ زراعت کے سیکرٹری بھی شامل ہوں گے جب کہ وزارت قومی غذائی تحفظ کے سیکرٹری اس کمیٹی کے سیکرٹری کے طور پر کام کریں گے۔

کپاس کی پیداوار میں کمی اور چیلنجز

کمیٹی کے ممبران نے بتایا کہ کپاس کی پیداوار میں شدید کمی آئی ہے اور یہ ملکی تاریخ کی دوسری کم ترین سطح پر آگئی ہے۔ 2024-25 کے لیے قومی پیداوار سرکاری ہدف سے تقریباً 50 فیصد کم ہے اور گزشتہ سال کی پیداوار سے 34 فیصد کم ہوئی ہے۔

کمیٹی کے ممبر حسین طارق جاموٹ اور پی پی ایم این اے نے بتایا کہ حکومت کی 2024-25 کی کاٹن پالیسی ابھی تک سامنے نہیں آسکی۔

انہوں نے کہا کہ آئی ایم ایف کے معاہدے کے سبب کپاس پر سپورٹ پرائس نہیں دی جاسکی جس کے نتیجے میں کپاس کی صنعت میں بحران پیدا ہوچکا ہے۔

موسمی حالات اور درآمدی پالیسیوں کا اثر

کمیٹی کے ممبران نے اس بات پر بھی زور دیا کہ موسمی حالات اور ناموافق درآمدی پالیسیوں کی وجہ سے کپاس کی صنعت کو شدید بحران کا سامنا ہے۔

رواں سیزن میں سندھ کی کپاس کی پیداوار زیادہ جب کہ پنجاب کی پیداوار کم ہوئی ہے۔ 2011 میں 14 ملین کی پیداوار 6 ملین تک پہنچ چکی ہے جو صنعت کے لیے ایک بڑا چیلنج ہے۔