کراچی: پاکستان اسٹاک ایکسچینج میں کاروبار کا مثبت رجحان جاری ہے اور 100 انڈیکس نے تاریخ کی نئی بلندی کو چھو لیا ہے۔

کاروباری ہفتے کے چوتھے روز پاکستان اسٹاک ایکسچینج میں مثبت رجحان دیکھنے کو مل رہا ہے، کاروبار کے دوران اسٹاک مارکیٹ میں تیزی کی لہر جاری ہے۔

ٹریڈنگ کے دوران پاکستان اسٹاک ایکسچینج میں 1410 سے زائد پوائنٹس کا اضافہ ہوا جس کے ساتھ اسٹاک مارکیٹ میں ہنڈرڈ انڈیکس ایک لاکھ 19 ہزار 384 پوائنٹس کی حد کو چھو گیا۔

اسٹاک مارکیٹ ٹریڈنگ کے دوران نئی تاریخی سطح 1 لاکھ 19 ہزار 421 کی سطح بھی ٹریڈ ہوا۔

وزیراعظم کا اظہار اطمینان

وزیراعظم محمد شہباز شریف نے پاکستان اسٹاک ایکسچینج کے تاریخ میں پہلی بار ایک لاکھ 19 ہزار پوائینٹس کی حد عبور کرنے پر اطمینان کا اظہار کیا اور کہا کہ اسٹاک مارکیٹ میں کاروبار کی مثبت سمت حکومت کی معاشی پالیسیوں پر تاجروں اور سرمایہ کاروں کے بڑھتے ہوئے اعتماد کا اظہار ہے۔

انہوں نے کہا کہ بہتر ہوتے معاشی اعشاریے اور کاروباری ماحول پچھلے ایک سال کے دوران حکومت کی معاشی پالیسیوں کی وجہ سے ممکن ہوا۔

وزیراعظم نے مزید کہا کہ حکومت ملک میں کاروبار اور سرمایہ کاری کے لئے مثبت ماحول کی فراہمی کے حوالے سے ترجیحی بنیادوں پر تمام تر سہولیات فراہم کر رہی ہے۔