اسلام آباد: عالمی ریٹنگ ایجنسی فچ نے پاکستانی معیشت پر اعتماد کا اظہار کرتے ہوئے ریٹنگ اپ گریڈ کردی۔

پاکستان کی معیشت کے لیے ایک خوش آئند پیش رفت سامنے آئی ہے، جہاں عالمی کریڈٹ ریٹنگ ایجنسی فچ نے پاکستان کی غیر ملکی قرضوں کی ادائیگیوں سے متعلق کریڈٹ ریٹنگ ’’ٹرپل سی پلس‘‘ سے بڑھا کر ’’بی مائنس کردی ہے جب کہ آؤٹ لک کو بھی مستحکم قرار دیا ہے۔

فچ کی جانب سے جاری کردہ رپورٹ میں پاکستان کی مالی اور اقتصادی پالیسیوں پر اطمینان کا اظہار کرتے ہوئے کہا گیا ہے کہ معاشی میدان میں جاری استحکام اور بجٹ خسارے میں کمی کی کوششوں کے باعث ریٹنگ میں بہتری ممکن ہوئی ہے۔

رپورٹ میں بتایا گیا ہے کہ حکومت کی جانب سے مالی خسارہ 6 فیصد تک محدود کرنے کے اقدامات قابل تعریف ہیں جب کہ قرضوں کا مجموعی تناسب بھی کم ہو کر 67 فیصد پر آ گیا ہے۔

فچ رپورٹ کے مطابق مہنگائی کی شرح 5 فیصد تک آنے کی پیش گوئی کی گئی ہے جب کہ شرح نمو 3 فیصد تک متوقع ہے۔

رپورٹ میں کہا گیا ہے کہ ترسیلات زر میں اضافے اور کرنٹ اکاؤنٹ کے سرپلس میں تبدیل ہونے سے معیشت کو سہارا ملا ہے جب کہ زرمبادلہ کے ذخائر 18 ارب ڈالر تک پہنچ گئے ہیں۔

فچ کا کہنا ہے کہ پاکستان کو آئندہ بھی 9 ارب ڈالر کی بیرونی ادائیگیاں کرنی ہیں جب کہ چین سے قرضوں کی ری فنانسنگ پر انحصار برقرار رہے گا۔

تاہم ایجنسی نے خبردار کیا ہے کہ سیاسی دباؤ اور سیکیورٹی خدشات پاکستان کے لیے بڑے چیلنجز بنے رہیں گے۔