کراچی: پاکستان اسٹاک ایکسچینج (پی ایس ایکس) میں جمعے کے روز کاروبار کا آغاز شدید مندی کے ساتھ ہوا، جس کی بڑی وجہ اسرائیل کی جانب سے ایران پر کیے گئے فضائی حملے کو قرار دیا جا رہا ہے۔

کاروباری ہفتے کے اختتام پر سرمایہ کاروں میں بے یقینی اور تشویش کے باعث ہنڈریڈ انڈیکس میں ابتدا میں ہی 1414 پوائنٹس کی کمی دیکھی گئی، جس سے انڈیکس 1 لاکھ 22 ہزار 679 پوائنٹس پر آ گیا، تاہم کچھ ہی دیر میں یہ مندی مزید گہری ہوگئی۔

اسرائیل اور ایران کے درمیان کشیدگی میں اچانک اضافے کے باعث مارکیٹ میں گھبراہٹ کا ماحول دیکھنے میں آیا، جس کے نتیجے میں انڈیکس مجموعی طور پر 2100 سے زائد پوائنٹس کی کمی کے ساتھ 1 لاکھ 21 ہزار 917 پوائنٹس کی سطح پر آگیا۔

عالمی سیاسی کشیدگی کا اثر

تجزیہ کاروں کے مطابق مشرقِ وسطیٰ میں پیدا ہونے والی جنگی صورتحال اور ممکنہ طور پر تیل کی قیمتوں میں اضافے کے خدشات نے سرمایہ کاروں کو محتاط کر دیا ہے، اس جغرافیائی بحران نے نہ صرف پاکستان بلکہ دیگر علاقائی منڈیوں پر بھی اثر ڈالا ہے۔

مزید مندی کا خدشہ

مارکیٹ ماہرین کا کہنا ہے کہ اگر ایران اور اسرائیل کے درمیان کشیدگی میں مزید اضافہ ہوا تو سرمایہ کاروں کی جانب سے سیف ہیون اثاثوں (جیسے سونا، ڈالر) کی طرف رجحان بڑھے گا، جو مارکیٹ کے لیے مزید دباؤ کا باعث بن سکتا ہے۔