کراچی: پاکستان اسٹاک ایکسچینج میں کاروباری ہفتے کے پہلے روز ہی زبردست تیزی کا رجحان دیکھنے میں آیا، جب ہنڈرڈ انڈیکس تاریخ میں پہلی بار 1 لاکھ 35 اور 36 ہزار پوائنٹس کی حد عبور کر گیا۔

 کاروباری ہفتے کے  پہلے دن انڈیکس میں 1800 پوائنٹس کا دوسرا بڑا اضافہ ریکارڈ کیا گیا، جس کے بعد ہنڈریڈ انڈیکس 1 لاکھ 36 ہزار 140
پوائنٹس کی تاریخی سطح پرٹریڈ ہوا۔

ہنڈریڈ انڈیکس کاروباری اختتام پر 2202 پوائنٹس کے اضافے کے ساتھ 1 لاکھ 36 ہزار 502 پوائنٹس پر بند ہوا جبکہ ٹریڈنگ کے دوران 1 لاکھ 36 ہزار 841 کی تاریخی سطح تک بھی ٹریڈ ہوا۔

اسٹاک مارکیٹ میں کاروبار 1.64 فیصد ریکارڈ کیا گیا جبکہ پورا دن 37 ارب روپے مالیت 84 کروڑ حصص کا کاروبار ہوا، 264 کمپنیوں کے حصص میں اضافہ، 194 کمپنیوں کے حصص میں کمی اور 16 کمپنیوں کے حصص میں استحکام رہا۔

تجزیہ کاروں کے مطابق سرمایہ کاروں کے بڑھتے ہوئے اعتماد، اقتصادی اشاریوں میں بہتری اور مالیاتی پالیسیوں میں تسلسل نے مارکیٹ کو تقویت دی ہے۔

مزید پڑھیں: کاروباری ہفتے کے دوران اسٹاک مارکیٹ نے تاریخی سنگ میل عبورکر لیا

واضح رہے کہ نئے مالی سال 2025-26ء کے آغاز کے ساتھ ہی بازارِ حصص میں غیر معمولی سرگرمی دیکھنے میں آ رہی ہے، سرمایہ کاروں کے اعتماد میں واضح اضافہ ہوا ہے، جس کے نتیجے میں مارکیٹ نے تیزی کی نئی بلندیوں کو چھونا شروع کر دیا ہے۔

مارکیٹ کی حالیہ کارکردگی پچھلے کئی برسوں کے مقابلے میں نمایاں طور پر بہتر ہے، گزشتہ روز بھی کے ایس ای 100 انڈیکس نے 134,299 پوائنٹس کی نفسیاتی حد کو عبور کیا تھا اور آج کی پیش رفت اس رجحان کو مزید مضبوط کرتی ہے۔

معاشی ماہرین کے مطابق یہ بہتری حکومتی مالی پالیسیوں، آئی ایم ایف پروگرام میں پیش رفت اور بیرونی سرمایہ کاری کے امکانات میں بہتری کا نتیجہ ہے، جو مارکیٹ میں نئے اعتماد کا باعث بن رہی ہے۔