کراچی: اسٹیٹ بینک آف پاکستان نے ملک بھر میں ماحول دوست ٹرانسپورٹ کے فروغ کے لیے بڑی اسکیم متعارف کرا دی ہے جس کے تحت شہریوں کو قسطوں پر الیکٹرانک بائیکس، رکشے اور لوڈرز فراہم کیے جائیں گے۔

اس اسکیم کے تحت مجموعی طور پر 1 لاکھ 16 ہزار ای بائیکس اور 3170 الیکٹرانک رکشے اور لوڈرز فراہم کیے جائیں گے جنہیں دو مرحلوں میں تقسیم کیا گیا ہے۔

قرض اور اقساط کی تفصیلات

اسٹیٹ بینک کے مطابق ای بائیکس کے لیے 2 لاکھ روپے تک کا قرض اور الیکٹرانک رکشہ یا لوڈر کے لیے 8 لاکھ 80 ہزار روپے تک کا قرض دیا جائے گا۔ ای بائیکس کا قرض2  سال جب کہ ای رکشہ اور لوڈر کا قرض 3 سال کے لیے ہوگا۔

قرض کی قیمت اسلامی اور روایتی بینکوں کے ذریعے کائیبور پلس 2.75 فیصد پر ہوگی تاہم صارفین کو یہ قرض صفر فیصد مارک اپ پر فراہم کیا جائے گا۔

مرحلہ وار تقسیم

پہلے مرحلے میں 40 ہزار ای بائیکس اور 1 ہزار ای رکشے/ لوڈرز تقسیم کیے جائیں گے۔ دوسرے مرحلے میں 76 ہزار ای بائیکس اور 2171 رکشے/ لوڈرز فراہم کیے جائیں گے۔

مخصوص کوٹہ

ای بائیکس میں سے 25 فیصد خواتین کو فراہم کی جائیں گی۔10  فیصد ای بائیکس کاروباری حضرات اور کوریئر سروسز کو دی جائیں گی۔

رکشوں اور لوڈرز میں سے 30 فیصد فلیٹ آپریٹرز کو ملیں گے جن کی اہلیت کا فیصلہ اسٹیرینگ کمیٹی کرے گی۔

واضح رہے کہ یہ اسکیم نہ صرف روزگار کے مواقع پیدا کرے گی بلکہ ایندھن کے خرچ میں کمی اور ماحولیاتی بہتری میں بھی اہم کردار ادا کرے گی۔