اسلام آباد: پاکستان اور سعودی عرب کے درمیان تجارت اور سرمایہ کاری کو فروغ دینے کے امکانات روشن ہوگئے ہیں۔

ذرائع وزارتِ تجارت کے مطابق ایک اعلیٰ سطحی سعودی وفد کا اکتوبر میں دورہ پاکستان متوقع ہے جس دوران دونوں ممالک کے درمیان اہم معاہدے اور تعاون بڑھانے پر بات چیت ہوگی۔

ذرائع کا کہنا ہے کہ سعودی ولی عہد کے دورہ پاکستان کو بھی خارج از امکان قرار نہیں دیا جاسکتا۔ سعودی وفد کے دورے کے دوران پاک سعودی بزنس فورم منعقد کیا جائے گا، جہاں دونوں ملکوں کے سرمایہ کار اور تاجر براہِ راست ملاقات کریں گے۔

وزارتِ تجارت نے بتایا کہ پاکستان اور سعودی عرب کے درمیان تجارتی امکانات کا تفصیلی جائزہ لینے کے لیے وفاقی وزیر تجارت جام کمال اور دیگر متعلقہ حکام کی زیر صدارت اجلاس منعقد کیا گیا جس میں مختلف شعبوں میں تعاون پر مشاورت کی گئی۔

ذرائع نے مزید بتایا کہ سعودی عرب کی جانب سے پاکستان میں انفرااسٹرکچر، آئل سیکٹر اور ڈیجیٹل اکانومی میں سرمایہ کاری کے امکانات ہیں جب کہ آئی ٹی، انرجی اور ٹیکنالوجی کے شعبوں میں تعاون بڑھانے پر بھی بات چیت ہوگی۔

وزارتِ تجارت کے حکام کے مطابق پاکستان اور سعودی عرب کے درمیان تعلقات میں ایک بار پھر گرم جوشی دیکھنے میں آ رہی ہے اور دونوں ملکوں نے فیصلہ کیا ہے کہ تجارتی تعلقات کو مزید وسعت دینے کے لیے روابط میں تیزی لائی جائے گی۔