پاکستان بہت جلد دنیا کی بڑی معیشتوں میں شامل ہوجائے گا،پاکستان کے معاشی اقدامات قابل تعریف ہیں۔ امریکی حکام بھی اس کے معترف ہوگئے۔

امریکی ناظم الامور نیٹالی بیکر نے پاکستان کے معاشی اقدامات کو بے حد سراہا ہے ۔ انہوں نے کہاکہ پاکستان امریکی کمپنیوں کے لیے سرمایہ کاری اورکاروبارکے وسیع مواقع موجود ہیں۔

ان کاکہناتھاکہ امریکی کاروباری ادارے پاکستان کے استحکام اور ترقی میں اہم کردار ادا کر سکتے ہیں۔

نیٹالی بیکر نے امید ظاہر کی  2050 تک پاکستان دنیا کی 10 سے 15 بڑی معیشتوں میں شامل ہوجائے گا۔

ان خیالات کا اظہارانہوں نے بزنس کونسل فار انٹرنیشنل انڈر اسٹینڈنگ کے زیر اہتمام ویبینار سے خطاب میں کیا۔

اجلاس میں میں امریکا اور پاکستان کے بزنس لیڈرز اورمالیاتی اداروں کے نمائندے بھی شریک تھے۔

نیٹالی بیکر نے پاکستان کی اسٹریٹجک اہمیت پر زور دیا ۔ انہوں نے کہاکہ یہ دنیا کا پانچواں بڑا ملک ہے جس کی آبادی 25 کروڑ ہے اور ان میں سے 64 فیصد افراد 30 برس سے کم عمر ہیں۔

انہوں نے کہا کہ پاکستان کا جی ڈی پی تقریباً 412 ارب ڈالر ہے اور یہ دنیا میں 38 ویں نمبر پر ہے۔

تاہم گولڈمین سیکس کے مطابق 2050 تک یہ 3.3 کھرب ڈالر تک پہنچ سکتاہے۔

نیٹالی بیکر نے امریکی سرمایہ کاروں کے لیے اہم شعبوں کی نشاندہی بھی کی جن میں کرٹیکل منرلز، آئی ٹی اور کمیونیکیشن، زراعت، توانائی اور انفراسٹرکچر ڈویلپمنٹ شامل ہیں۔

انہوں نے کہا کہ امریکی کمپنیاں، امریکی مشن پاکستان کی فارن کمرشل سروس ٹیم سے رابطہ کریں اور پاکستانی اداروں کے ساتھ شراکت داری کے مواقع تلاش کریں۔