لاہور ہائی کورٹ (ایل ایچ سی) کے سینئر جج جسٹس امین الدین خان نے سپریم کورٹ آف پاکستان کے جج کی حیثیت سے حلف اٹھا لیا۔

حلف بردرای کی تقریب وفاقی دارالحکومت اسلام آباد میں ہوئی، جہاں چیف جسٹس آصف سعید کھوسہ نے جسٹس امین الدین سے حلف لیا۔ تقریب حلف برداری میں سپریم کورٹ کے ججز رجسٹرار سپریم کورٹ اور سنیئر وکلاء نے شرکت کی۔

واضح رہے کہ جسٹس شیخ عظمت سعید کی ریٹائرمنٹ کے بعد جوڈیشل کمیشن نے جسٹس امین الدین خان کی بطور جج سپریم کورٹ تعیناتی کی سفارش کی تھی،جسٹس امین الدین خان کی بطور جج سپریم کورٹ تعیناتی کا نوٹیفیکیشن صدر مملکت عارف علوی کی منظوری کے بعد 16 اکتوبر کو جاری کیا گیا تھا۔

جسٹس امین الدین خان نے 1985 میں ماتحت عدالتوں میں پریٹکس شروع کی، جس کے بعد 1987 میں وہ لاہور ہائی کورٹ کے اور پھر 2001 میں سپریم کورٹ کے ایڈووکیٹ مقرر ہوئے۔

انہوں نے 2001 میں ملتان میں ظفر لا چیمبر میں شمولیت اختیار کی اور جج کے عہدے پر پہنچنے سے قبل تک وہ اسی قانونی فرم کے ساتھ کام کرتے رہے، بعد ازاں 2011 میں ان کا بینچ کے لیے تقرر ہوگیا۔

اپنے کیریئر کے دوران انہوں نے میاں نثار احمد اور عمر عطا بندیال جیسے معروف وکلا کے ساتھ کام کیا۔

جسٹس امین الدین نے شہری معاملے کے ہزاروں کیسز کا فیصلہ کیا ہے اور ان کے بہت سے فیصلوں کو سپریم کورٹ نے برقرار رکھا ہے۔