نیب ترامیم کے خلاف عمران خان کی درخواست پر ریمارکس پیش کرتے ہوئے جسٹس منصور علی شاہ نے پی ٹی آئی کے وکیل کو کہا ہے کہ اگر آپ انتخابات جیتتے ہیں تو اپنی ترامیم لائیں۔

تفصیلات کے مطابق نیب ترامیم کے خلاف عمران خان کی درخواست پر سپریم کورٹ میں چیف جسٹس عمر عطا بندیال کی سربراہی میں بنچ نے سماعت کی۔

سپریم کورٹ میں نیب ترامیم کے خلاف عمران خان کی درخواست پر سماعت ہوئی، دوران سماعت چیف جسٹس نے کہا کہ ابھی یو اے ای بھی منی لانڈرنگ کے کمزور قوانین کی وجہ سے گرے لسٹ میں ہے۔

جسٹس اعجاز الاحسن نے کہا کہ عوامی پیسہ کے غلط استعمال سے بھی عوام کا اعتماد خراب ہوتا ہے۔

اس موقع پر جسٹس منصور علی شاہ نے خواجہ حارث سے مکالمہ کرتے ہوئے کہا کہ اپ کی باتیں پارلیمنٹ کیلئے اچھی تقریر ہے،سننے کیلئے پارلیمنٹ میں ہونا بھی چاہیے، اگر آپ انتخابات جیتتے ہیں تو اپنی ترامیم لائیں۔

خواجہ حارث نے کہا کہ دنیا کا ہر ملک کرپشن قوانین اور سزاوں کو سخت کرنے کا کہہ رہا ہے، سوئس اکاونٹس کیس میں کیس ختم ہوتے ہی سارا ریکارڈ غائب کردیا گیا،نیب ریفرنسز میں بھی اصلی دستاویزات نہ ہونے سے ملزمان بری ہوئے، 31 اے ختم نہ ہوتا تو اسحاق ڈار واپس نہیں اسکتے تھے۔

جسٹس منصور علی شاہ نے کہا کہ اگر کوئی ایسا کرے گا تو عوام اسکو ووٹ نہیں دیں گے، کیا عدالت پارلیمنٹ کو ترامیم لانے سے روک دے، خواجہ حارث نے کہا کہ پورا نظام مفلوج کیا جا رہا ہے، کیس کی مزید سماعت کل تک ملتوی کردی گئی۔