سندھ ہائی کورٹ نے بزرگ شہری کے باعث کیس کو فائل کورریڈ کرنے کا حکم دے دیا۔

تفصیلات کے مطابق گھرسے بے دخل کرکے گھر پر مبینہ قبضے کے تنازع کے معاملے پر 74 سالہ بزرگ ماں نے بیٹے اور بہوکے خلاف عدالت سے رجوع کرلیا۔

سندھ ہائی کورٹ نے 74 سالہ ماں کا کیس ترجیحی بنیادوں پر سننے کی استدعا منظورکرتے سماعت دو ہفتے بعد مقرر کر دی۔

عدالتِ عالیہ نے بزرگ شہری کے باعث کیس کو فائل کورریڈ کرنے کا حکم دے دیا۔

74 سالہ خاتون کے وکیل جی ایم کورائی ایڈووکیٹ نے مؤقف پیش کیا کہ میری مؤکلہ پر بہو نے دو مار حملہ کیا، بیٹا اور بہو ڈیفنس 5 فائیو میں واقع گھر پر قبضہ کرنا چاہتے ہیں۔

وکیل درخواست گزار نے کہا کہ میری مؤکلہ ڈیفنس 5 کے گھرکی قانونی مالکن ہیں۔ ڈپٹی کمشنر نے ماں کو سننے کے بعد بیٹے اور بہو کو گھر خالی کرنے کا حکم دیا۔

بزرگ خاتون کے وکیل نے مؤقف اپنایا کہ بیٹے اور بہو نے ڈی سی کے فیصلے کو سیشن عدالت میں چینلج کیا۔ سیشن عدالت نے بیٹے اور بہو کے مؤقف کو رد کیا، اب بیٹے اور بہو نے سیشن عدالت کو سندھ ہائی کورٹ میں چیلنج کردیا۔

جی ایم کورائی ایڈووکیٹ نے استدعا کی کہ بیٹے کامران احمد اور بہو تحمینہ کا کیس مسترد کیا جائے اورمیری مؤکلہ بزرگ شہری ہے، ترجیحی بنیادوں پر کیس سنا جائے۔